បន្ទាប់ពីការប្រឈមមុខគ្នាមិនធ្លាប់មានរវាងកងទ័ពឥណ្ឌា និងចិននៅជ្រលងភ្នំហ្គាឡាវ៉ាន តំបន់ព្រំដែននៃប្រទេសទាំងពីរ (ឥណ្ឌា-ចិន) កាលពីថ្ងៃទី១៥ មិថុនា កន្លងមកនេះ ពេលនេះមេបញ្ជាការកងទ័ពនៃប្រទេសឥណ្ឌា-ចិនបានជួបមុខគ្នាដើម្បីព្យាយាមស្វែងរកដំណោះស្រាយភាពតានតឹងនៅតាមព្រំដែន តាមរយៈការចូលរួមរវាងកងទ័ព និងកងទ័ព និងប្រមុខការទូតរបស់ប្រទេសទាំងពីរ ។ នេះបើយោងតាមប្រភពទីភ្នាក់ងារសារព័ត៌មាន Sputnik ដែលបានចេញផ្សាយនៅថ្ងៃទី៣០ ខែមិថុនា ឆ្នាំ២០២០ នេះ ។
មេបញ្ជាការនៃកងទ័ពឥណ្ឌា និងចិនកំពុងប្រជុំនៅថ្ងៃនេះជាលើកទីបីដើម្បីរកដំណោះស្រាយកាត់បន្ថយជម្លោះនៅតាមបណ្តោយព្រំដែនអន្តរជាតិរវាងប្រទេសទាំងពីរដែលបានផ្ទុះការប៉ះទង្គិចគ្នារហូតដល់មានការបង្ហូរឈាមមួយរវាងកងទ័ព កាលពីថ្ងៃទី១៥ មិថុនា ដែលក្នុងនោះមានទាហានឥណ្ឌា២០នាក់ត្រូវបានស្លាប់បាត់បង់ជីវិត ។
ឧត្តមសេនីយ៍ឯក Harinder Singh មេបញ្ជាការ នៃកងទ័ពឥណ្ឌា នឹងជួបសមភាគីរបស់លោកមកពីកងទ័ពចិនគឺឧត្តមសេនីយ៍ទោ លីវ លីន ដែលជាមេបញ្ជាការកាន់កាប់តំបន់យោធា ស៊ីន ជាំង ខាងត្បូង នៃប្រទេសចិន ដើម្បីប្រជុំនៅចំណុចព្រំដែន ឈីស ស៊ូល នៅខាងឥណ្ឌា ។
ក្រោយការប៉ះទង្គិចគ្នាកន្លងមក ឥណ្ឌា-ចិន ធ្លាប់បើកការប្រជុំពីរលើករួចមកហើយនៅ ម៉ុនដូ របស់ភាគីចិន កាលពីថ្ងៃទី០៦ និងថ្ងៃទី២២ មិថុនា ។ ក្រុងញូវដែលី បានសម្រេចចិត្តបន្តការចរចាជាមួយទីក្រុងប៉េកាំង ។
ប្រភពព័ត៌មានពីរដ្ឋាភិបាលឥណ្ឌាបានឲ្យដឹងថា៖ «យើងមិនចង់ឲ្យមានការកើតឡើងបែបនេះទេ ប៉ុន្តែយើងនឹងមិនសម្របសម្រួលដោយការផ្តល់អំណោយដល់ប្រទេសចិនទេ» ។ ទន្ទឹមនឹងនេះរបាយការណ៍មួយទៀតបានបង្ហាញថា ប្រទេសឥណ្ឌាបានដាក់ពង្រាយរថក្រោះបាញ់មីស៊ីលធុន T-90 ចំនួន៦គ្រឿង និងប្រព័ន្ធកាំជ្រួចប្រឆាំងនឹងរថក្រោះទៅកាន់តំបន់ជួរមុខនៅក្នុងតំបន់ជ្រលងភ្នំហ្គាលវ៉ាន់ដើម្បីទប់ទល់ជាមួយចិនផងដែរករណីមានការផ្ទុះអាវុធណាមួយកើតឡើង ៕