បរទេស៖ នៅយប់ថ្ងៃទី ២៩ ខែមិថុនា ឆ្នាំ ២០២០ មានករណីឃាតកម្ម មកលើខ្មែរក្រោមមួយគ្រួសារ ដែលជនសង្ស័យជាឃាតកជាជនជាតិយួន ត្រូវបានសមត្ថកិច្ចនគរបាល ចាប់ខ្លួនរួចហើយ នៅព្រឹកថ្ងៃទី ៣០ ខែមិថុនា នេះ ។
ព័ត៌មានបឋម ដែលវិទ្យុសំឡេងកម្ពុជាក្រោម ទទួលបានឲ្យដឹងថា អំពើឃាតកម្មដ៏ព្រៃផ្សៃ មកលើខ្មែរក្រោមមួយគ្រួសារនោះ ស្ថិតនៅភូមិជ្រៃភេ ស្រុកកញ្ចោង ខេត្តព្រះត្រពាំង ត្រូវជនដៃដល់ជាឃាតក និងជាជនជាតិយួនផង បានសម្លាប់ទៅលើសមាជិកគ្រួសារមានមនុស្ស ២ នាក់ ដែលម្នាក់ជាកម្មការិនីរោងចក្រ អាយុ ៣៦ ឆ្នាំ និង បុរសជាឪពុកម្នាក់អាយុ ៦៧ ឆ្នាំ ។
ហេតុការណ៍បង្កឲ្យមានការភ្ញាក់ផ្អើលនេះ បើតាមអ្នកភូមិ នៅក្បែរផ្ទះជនរងគ្រោះទាំងពីរនោះ សង្ស័យជារឿងគំនុំ (ប៉ុន្តែ មិនទាន់ដឹងថា ជាគំនុំរឿងអ្វីនោះទេ) ។ តាមប្រភពពីអ្នកឃើញហេតុការណ៍ នៅកន្លែងកើតហេតុ បានប្រាប់ឲ្យដឹង ជនរងគ្រោះជាកម្មការិនីខ្មែរក្រោម ឈ្មោះ ថាច់ ធីសាភា អាយុ ៣៦ នៅវេលាម៉ោង១០យប់ បានចេញមកពីធ្វើការរោងចក្រ រួចហើយក៏ទៅងូតទឹកនៅក្រោយផ្ទះរបស់ខ្លួន ស្រាប់តែឃាតករលបមកវាយសម្លាប់ពីក្រោយខ្នង បណ្តាលឲ្យស្លាប់ភ្លាមៗ ។ អ្នកឃើញហេតុការណ៍ដដែលនេះ បានបញ្ជាក់ទៀតថា នៅមុនពេលកើតខាងលើ ឪពុករបស់ជនរងគ្រោះ ឈ្មោះ ថាច់ ឈួន អាយុ ៦៧ ឮសូរសំឡេងស្រែកខ្លាំង ក៏រត់ចេញមកជួយ ហើយពេលនោះ ក៏ត្រូវបានឃាតកសម្លាប់ទាំងឪពុកតែម្តង ។
ជុំវិញករណីនេះ សមត្ថកិច្ចនគរបាលយួន កំពុងតែបើការស៊ើបអង្កេលើករណីឃាតកម្មនេះ ព័ត៌មានបន្ថែមអង្គភាពពួកយើង នឹងធ្វើបច្ចុប្បន្នភាពជម្រាបជូនជាបន្តបន្ទាប់នៅពេលក្រោយទៀត ៕
