Flash Player គឺជាកម្មវិធីមួយក្នុងចំណោមកម្មវិធីជាច្រើនរបស់ក្រុមហ៊ុន Adobe ដែលជាកម្មវិធីអាចឱ្យវីដេអូនៅលើ Internet Browser ដំណើរការបាន និងមានការពេញនិយមយ៉ាងខ្លាំងកាលពីជាងមួយទសវត្សរ៍មុន។ ពេលវេលាចេះតែដើរទៅមុខ ស្របពេលជាមួយបច្ចេកវិទ្យាក៏ចេះតែវិវឌ្ឍន៍ទៅកាន់តែល្អប្រសើរឡើងក្នុងការបង្កើតកម្មវិធីថ្មីៗដើម្បីធ្វើឱ្យអ្នកប្រើប្រាស់កាន់តែមានភាពងាយស្រួល ។
ដូចគ្នានេះដែរ ការដាក់ចេញឱ្យប្រើប្រាស់ HTML5 កាលពីឆ្នាំ ២០០៨ ដែលមានបន្ថែមមុខងាររបស់ Adobe Flash ដោយមិនចាំបាច់បញ្ចូលកម្មវិធីបន្ថែមនោះ បានធ្វើឱ្យក្រុមហ៊ុនមួយចំនួនជាពិសេសក្រុមហ៊ុន Apple ចាប់ផ្ដើមឈប់ប្រើប្រាស់ Adobe Flash ហើយងាកមកប្រើមុខងារនេះជាមួយ HTML5 វិញ។
ក្រុមហ៊ុន Adobe គ្រោងនឹងស្នើសុំឱ្យអ្នកប្រើប្រាស់លុបកម្មវិធី Flash Player ចេញពីកុំព្យូទ័ររបស់ពួកគេនៅដំណាច់ឆ្នាំនេះ ស្របពេលដែលកម្មវិធីនេះត្រូវបានគ្រោងនឹងឈានដល់ទីបញ្ចប់នៃជីវិត (End-Of-Life) នៅថ្ងៃទី៣១ ខែធ្នូ ឆ្នាំ២០២០ នេះដែរ។ តាមពិតទៅ កម្មវិធី Flash Player ត្រូវបានប្រកាសឱ្យឈប់ប្រើប្រាស់តាំងពីអំឡុងឆ្នាំ២០១៧ មកម្លេះ រួមជានឹងក្រុមហ៊ុនផលិត Browser ដូចជា Apple, Google, Microsoft និង Mozilla ដោយឡែក មានតែ Facebook តែប៉ុណ្ណោះដែលនៅតែត្រូវការពឹងផ្អែកទៅលើ Flash Player ដើម្បីឱ្យហ្គេមមួយចំនួនអាចដំណើរការបាន ។
មូលហេតុនៃគោលបំណងធ្វើនេះ គឺដោយសារតែ Flash Player តែងតែត្រូវបានវាយប្រហារដោយពួក Hacker និងអ្នកបង្កើតមេរោគ Malware។ Adobe ក៏បានឱ្យដឹងថានៅពេល Flash ឈានដល់កាលបរិច្ឆេទបញ្ចប់ ក្រុមហ៊ុនមិនត្រឹមតែមានគម្រោងបញ្ឈប់ការផ្តល់ជូននូវការធ្វើបច្ចុប្បន្នភាព (Update) ប៉ុណ្ណោះទេ ហើយពួកគេក៏មានគម្រោងនឹងដកតំណទាញយក (Download Link) Flash Player ចេញពីគេហទំព័ររបស់ពួកគេផងដែរ ដើម្បីជៀសវាងកុំឱ្យអ្នកប្រើប្រាស់បញ្ចូលកម្មវិធី Flash ដែលអាចប្រឈមនឹងការវាយប្រហារថ្មីៗបន្តទៀត ជាពិសេសនៅពេលដែលក្រុមហ៊ុនបញ្ចប់ការធ្វើបច្ចុប្បន្នភាពនោះ៕
ប្រភព ៖ នាយកដ្ឋានប្រឆាំងបទល្មើសបច្ចេកវិទ្យា