ខេត្តរតនគិរី ៖ កម្លាំងកងរាជអាវុធហត្ថស្រុកកូនមុំបានបង្កសំណុំរឿងបញ្ជូនខ្លួនជនសង្ស័យម្នាក់ពាក់ព័ន្ធករណីរំលោភសេពសន្ថវៈលើអនីតិជនអាយុ៣ឆ្នាំបានសម្រេចទៅសាលាដំបូងខេត្តចាត់ការតាមច្បាប់ នៅរសៀលថ្ងៃទី១៨ ខែមិថុនា ឆ្នាំ២០២០ បន្ទាប់ពីបានឃាត់ខ្លួនជនសង្ស័យខាងលើនេះ កាលពីព្រឹកថ្ងៃទី១៦ ខែមិថុនា ឆ្នាំ២០២០ នៅត្រង់ចំណុចការដ្ឋានទី២ ក្នុងក្រុមហ៊ុន ហ័ង អញ់យ៉ាឡាយ (វៀតណាម) ស្ថិតនៅក្នុងភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី។
លោកវរសេនីយ៍ត្រី រស់ វណ្ណា មេបញ្ជាអាវុធហត្ថស្រុកកូនមុំបានឲ្យដឹងនៅល្ងាចថ្ងៃទី១៨មិថុនានេះ ថា ជនសង្ស័យឈ្មោះ វ៉ាន់ រាសី (ហៅ បារាំង)ភេទប្រុស អាយុ៤០ឆ្នាំ ជនជាតិខ្មែ មុខរបរកម្មករចម្ការចេកនៅក្រុមហ៊ុនខាងលើ មានទីលំនៅបណ្តោះអាសន្ន ភូមិ/ឃុំកើតហេតុខាងលើ ។ រីឯជនរងគ្រោះឈ្មោះ ឡ.វ.ហ ភេទស្រី អាយុ៣ឆ្នាំ ជនជាតិខ្មែរ មានទីលំនៅភូមិព្រះនង្គ័ល ឃុំព្រះនង្គ័ល ស្រុកថាឡាបរិវ៉ាត់ ខេត្តស្ទឹងត្រែង ។ ក្មេងស្រីរងគ្រោះបានស្នាក់នៅជាមួយម្តាយដែលធ្វើការនៅក្នុងក្រុមហ៊ុនហ័ងអញ់យ៉ាឡាយនេះដែរ ។
លោកវរសេនីយ៍ត្រីបានបញ្ជាក់ទៀតថា ក្រោយពីទទួលបានពាក្យបណ្តឹងពីម្តាយក្មេងស្រីរងគ្រោះ ភ្លាម កម្លាំងអាវុធហត្ថបានចុះមកធ្វើការអន្តរាគមន៍ភ្លាមៗហើយបានឃាត់ខ្លួនជនសង្ស័យបញ្ជូនមកកាន់ទីបញ្ជាការអាវុធហត្ថខេត្តដើម្បីកសាងសំណុំរឿងបញ្ជូនទៅអយ្យការអមសាលាដំបូងខេត្តផ្តន្ទាទោសទៅតាមផ្លូវច្បាប់ ៕
