រាជធានីភ្នំពេញ ៖ មន្ត្រីកងរាជអាវុធហត្ថរាជធានីបានឲ្យដឹងនៅថ្ងៃទី១៨ មិថុនាថា សកម្មភាពកងកម្លាំងយានយន្ត នៃមន្ទីរសម្ភារៈបច្ចេកទេស កងរាជអាវុធហត្ថរាជធានីភ្នំពេញ បានបន្តចុះអនុវត្តន៍ ត្រួតពិនិត្យ អាវុធជាតិផ្ទុះ និងរថយន្តដែលបំពាក់ផ្លាកលេខ ខេមរភូមិន្ទ (ខ.ម) ក្លែងក្លាយ ជាពិសេសឡានដឹកដីតែម្ដងមិនដឹងគេអាងអីបានហ៊ានប្រើផ្លាកលេខ ខ.ម មករកស៊ីឯកជនខ្លួនឯងទៅវិញហើយឡានដឹកដី ដឹកថ្ម ដឹកខ្សាច់ខ្លះ ពាក់ផ្លាកលេខសេះហោះ (ក្លែងក្លាយ) ទៀត ។ រថយន្តប្រភេទនេះត្រូវតែចាត់វិធានការជាបន្ទាន់តាមបទបញ្ជាដ៏ម៉ឺងម៉ាត់របស់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថ លើផ្ទៃប្រទេស និងជាមេបញ្ជាការកងរាជ អាវុធហត្ថរាជធានី ។
មន្ត្រីដដែលបានបន្តថា កម្លាំងក្នុងទីបញ្ជាការក៏ដូចជាកម្លាំងតាមបណ្តាមូលដ្ឋានអាវុធហត្ថខណ្ឌទាំង១៤ នៃកងរាជអាវុធហត្ថរាជធានីភ្នំពេញ បានធ្វើការត្រួតពិនិត្យសុខភាព វាស់កម្ដៅ បាញ់ថ្នាំសម្លាប់មេរោគ ដល់នាយទាហាន នាយទាហានរង ពលទាហាន ជាប្រចាំដើម្បីបង្ការ ទប់ស្កាត់ និងចៀសផុតពីជំងឺឆ្លងកូវីដ-១៩ ។
ក្រៅពីអនុវត្តវិធានការត្រួតពិនិត្យអាវុធជាតិផ្ទុះ និងរថយន្តពាក់ផ្លាកលេខ ខ.ម ក្លែងក្លាយមក សកម្មភាពកម្លាំងកងរាជអាវុធហត្ថរាជធានីភ្នំពេញ ត្រៀមរង់ចាំបទបញ្ជាចេញបេសកកម្ម ការពារ សន្តិសុខ សណ្ដាប់ធ្នាប់ សុវត្ថិភាព ដល់គណៈប្រតិភូជាតិ អន្តរជាតិ ជួយសម្រួលចរាចរជូនបងប្អូនប្រជាពលរដ្ឋ និងសិស្សានុសិស្សឆ្លងផ្លូវ តាមភូមិសាស្ត្រសំខាន់ៗ ក្នុងរាជធានីភ្នំពេញ ៕
