រាជធានីភ្នំពេញ ៖ តារាចម្រៀងសំនៀងផ្អែមអ្នកនាង ម៉េង កែវពេជ្ជតា ដែលត្រូវបានលោកជំទាវ ហ៊ុន ស៊ីណាត ធ្វើការប្តឹងទៅកាន់សាលាដំបូងរាជធានីភ្នំពេញពីបទបរិហារកេរ្តិ៍ជាសាធារណៈ និងញុះញង់ឲ្យមានការរើសអើង កាលពីថ្ងៃទី១៦ ខែមិថុនា ឆ្នាំ២០២០ បានចេញមុខឆ្លើយតបទៅនឹងបណ្តឹងរបស់លោកជំទាវវិញហើយកាលពីវេលាម៉ោង៧ និង៤០នាទីយប់ថ្ងៃទី១៦ ខែមិថុនា ឆ្នាំ២០២០ នេះតាមរយៈហ្វេសប៊ុកផេកផ្លូវការរបស់អ្នកនាង ។
តាមប្រភពពីអ្នកនាង ម៉េង កែវពេជ្ជតា បានបង្ហោះនូវខ្លឹមសារថា ៖«ក្មួយពិតជាមានកិត្តិយសណាស់ ដែលមីងធ្វើបែបនេះ អរគុណមីង ។ ការពិត តាំងពីដំបូងខ្ញុំមិនដែលបានយកឈ្មោះគាត់មកនិយាយសូម្បីបន្តិចទោះបីដឹងថា គាត់ធ្លាប់គិតខុសមកលើខ្ញុំក៏ដោយ ព្រោះខ្ញុំនៅផ្តល់កិត្តិយសអោយគាត់ និងពិសេសមិនចង់អោយឈ្មោះគាត់នេះ ទៅប៉ះពាល់ដល់ចាស់ទុំសាច់ញាតិល្អៗផ្សេងទៀតដែលលោកមិនពាក់ព័ន្ធ ។ ប៉ុន្តែបែរជាគាត់លោតកញ្ឆេងបែបនេះទៅវិញ ។ តើគាត់សំអាងអ្វីមកប្តឹងផ្តល់ ? ត្រឹមហេតុផលប៉ុណ្ណេះឬ ? តើសមនឹងប្តឹងដែរទេ ? សូមមើលសំណៅដើមរបស់ខ្ញុំ ដែលភ្ជាប់មកជាមួយខាងក្រោមនេះ» ។
អ្នកនាងបានឲ្យដឹងទៀតថា ៖ «សូមបញ្ជាក់ថា ខ្ញុំចាប់បានភស្តុតាងដែលយាយ ហង្ស បូរីនិងនាងប្រធានសមាគមសិល្បៈមានទំនាក់ទំនងល្អជាមួយនឹងអារាជបុត្រអាសូរ្យកាយ និងបានខ្ចីដៃអាសូរ្យកាយនេះមកជេរបញ្ចោរខ្ញុំយ៉ាងកប់ៗមាត់ជំនួសពួកគេវិញ ហើយគេចាំសើច និងចូលទៅគាំទ្រយ៉ាងពេញចិត្ត» ។
អ្នកនាងបន្ថែមថា ៖ «ឈ្មោះរាជបុត្រអាសូរ្យកាយម្នាក់នេះធ្លាប់បានជេរប្រមាថថ្នាក់ដឹកនាំកំពូលរាជរដ្ឋាភិបាលកម្ពុជា និងថ្នាក់ដឹកនាំល្អៗដទៃទៀតជាច្រើនយ៉ាងអសុរសដាច់សាច់ គ្មានកន្លែងណាអាចទទួលយកបាន តែបែរជាយាយ ហង្ស បូរី និងនាងប្រធានសមាគមសិល្បៈរូបនេះមានភាពស្និទ្ធស្នាលនឹងគ្នាចាក់ទឹកមិនលិចទៅវិញ តើមិនអោយខ្ញុំឆ្ងល់ទេឬ ? សូមបងប្អូនពិចារណា តើត្រង់ណាដែលខ្ញុំចោទអ្នកមីង ស៊ីណាត ? តើខ្ញុំចោទគាត់ឬខ្ញុំសួរ ? តើខ្ញុំចោទគាត់ ឬគាត់រើសដាក់ខ្លួនខ្លួនឯង ? តើគាត់ធ្វើនេះព្រោះចង់ប្រាប់ថា គាត់អាចធ្វើបាបនរណាក៏បាន ? គាត់កំពុងធ្វើអោយសង្គមដែលមានភាពស្ងប់សុខ ក្លាយទៅជាចលាចលដោយសារគាត់មែនទេ ?» ។
អ្នកនាង ម៉េង កែវពេជ្ជតា ថែមទាំងបានបញ្ជាក់ថា ៖ «មិនអីទេខ្ញុំនឹងទៅបំភ្លឺ ខ្ញុំមិនខ្លាចទេ ព្រោះការពិតនៅនឹងខ្ញុំ ប៉ុន្តែខ្ញុំសូមប្រកាសថា ពេជ្ជតា នឹងការពារកិត្តិយសខ្លួនអោយបានទោះទៅដល់ណា ហើយគ្មានហេតុផលអ្វីដែលពេជ្ជតាត្រូវទទួលទោសដ៏អយុត្តិធម៌បែបនេះជាដាច់ខាត ! សូមអរគុណសម្រាប់ក្តីស្រលាញ់ និងបារម្ភអំពីបងប្អូនទស្សនិកជន សូមបងប្អូនរក្សាចិត្តសិន ខ្ញុំជឿជាក់ថា អំណាចមិនមែនជាកត្តាជោគជ័យក្នុងប្រទេសដែលប្រើច្បាប់នេះទេ ខ្ញុំជឿថា យុត្តិធម៌ត្រូវតែមានសម្រាប់ខ្ញុំ ! ! !» ៕
ចុចអាន ៖ ផ្ទុះរឿងធំហើយ ! លោកជំទាវ ហ៊ុន ស៊ីណាត សម្រេចដាក់ពាក្យបណ្តឹងអ្នកនាង ម៉េង កែវពេជ្ជតា