រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជាបានប្រកាសពីតួលេខនៃជំងឺគ្រុនឈាមក្នុងអំឡុង១៩សប្តាហ៍ដើមឆ្នាំ២០២០នេះមានរហូតដល់២១៧២ករណីដែលជាចំនួនករណីឈឺ និងអាចបន្តកើនឡើងនៅតាមភូមិ-ឃុំ និងទីប្រជុំជននៃបណ្តាខេត្តនាពេលខាងមុខ ។ នេះបើតាមសេចក្តីប្រកាសរបស់ក្រសួងសុខាភិបាលស្តីពីវិធានការការពារ និងទប់ស្កាត់ជំងឺគ្រុនឈាមក្នុងរដូវវស្សាឆ្នាំ២០២០ នេះ ។
តាមប្រភពរបស់ក្រសួងសុខាភិបាលបានឱ្យដឹងថា តាមការសិក្សារបស់កម្មវិធីជាតិប្រយុទ្ធនឹងជំងឺគ្រុនឈាម នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រកន្លងមកនេះបានបង្ហាញថា ជំងឺគ្រុនឈាមក្នុងរដូវវស្សាកើនឡើងច្រើនជាង២ដង បើធៀបនឹងចំនួនករណីក្នុងរដ្ូវប្រាំង ហើយមានទំនាក់ទំនងយ៉ាងខ្លាំងជាមួយនឹងកត្តាអាកាសធាតុដូចជា កំដៅ ចំនួនទឹកភ្លៀង និងសំណើម ។
ជំងឺគ្រុនឈាមអាចកើតលើមនុស្សគ្រប់វ័យ វាបង្កឡើងដោយសត្វមូសខ្លាញីខាំបឺតឈាមចម្លងមេរោគគ្រុនឈាមពីមនុស្សម្នាក់ទៅកាន់មនុស្សម្នាក់ទៀត ។ សត្វមូសខ្លាបង្កបង្កើតកូនចៅនៅក្នុងទឹកថ្លា ស្អាត និងចូលចិត្តរស់នៅជិតមនុស្ស វាហើរបានចម្ងាយមិនលើសពី១៥០ម៉ែត្រពីទីកន្លែងកកើត ។
យោងតាមការស្រាវជ្រាវផ្នែកបាណកសាស្ត្ររបស់កម្មវិធីជាតិប្រយុទ្ធនឹងជំងឺគ្រុនឈាម នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) រួមសហការជាមួយមន្ទីរសុខាភិបាលរាជធានី-ខេត្ត បានបញ្ជាក់ឱ្យឃើញថា សត្វមូសខ្លាចូលចិត្តពងបង្កបង្កើតកូនចៅនៅក្នុងសំបងកង់ឡាន និងសំបកកង់ម៉ូតូចាស់ៗ១១ដង ច្រើនជាងវត្ថុដាក់ទឹកសំរាប់ប្រើប្រាស់ផ្សេងៗ ។
ដូច្នេះដើម្បីការពារសុខភាពចៀសផុតពីការឆ្លងជំងឺគ្រុនឈាមដោយសារសត្វមូសខ្លាញីខាំឱ្យកាន់តែមានប្រសិទ្ធភាពខ្ពស់នោះ សូមប្រជាពលរដ្ឋទាំងអស់អនុវត្តតាមវិធានការណែនាំរបស់ក្រសួងសុខាភិបាល នៃព្រះរាជាណាចក្រកម្ពុជាដូចខាងក្រោម ៖