រាជធានីភ្នំពេញ ៖ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានថ្លែងប្រាប់វិទ្យុអន្តរជាតិ នៅថ្ងៃទី២៨ ឧសភានេះថា អាជ្ញាធរកម្ពុជា បានកត់ត្រាចំនួនស្ត្រីខ្មែរ ១១១នាក់ហើយ ដែលក្រោយពួកគេបានវិលត្រឡប់ពីប្រទេសចិនមកកម្ពុជាវិញ ដោយពួកគេអះអាងថា ត្រូវបានបង្ខំឲ្យរៀបការជាមួយជនជាតិចិន ឬរៀបការក្លែងក្លាយ ។
លោកស្រី បានមានប្រសាសន៍ថា ស្ត្រីទាំងនោះចេញទៅប្រទេសចិន តាំងពីឆ្នាំមុនៗមកម៉្លេះ ហើយពួកគេទើបត្រឡប់មកវិញ ក្នុងឆ្នាំ២០១៩ ។
លោកស្រី បន្តថា បើតាមចម្លើយរបស់ស្ត្រីទាំងអស់ពួកគាត់និយាយថា មានអាពាហ៍ពិពាហ៍ទៅប្រទេសក្រៅហ្នឹង ដោយបង្ខំ ។ ប៉ុន្តែមានពេលខ្លះមិនទាន់សន្មត ១០០ភាគរយទេ ដោយសារយើងត្រូវការការអង្កេតនៅលើករណីអស់ហ្នឹងទៀត ប៉ុន្តែភាគច្រើនស្ត្រីអស់ពួកគាត់មានបញ្ហាត្រង់ថា ពេលដែលគាត់ទៅហើយ ពេលដែលគាត់នៅក្នុងគ្រួសារមួយ ដែលមានបញ្ហា អ៊ីចឹងគាត់ចង់ត្រឡប់មកវិញ ។ អ៊ីចឹង គាត់ចាត់ទុកថា អ្វីដែលគាត់បានគូស្រករនៅទីនោះ គឺជារឿងក្លែងក្លាយ ។
លោកស្រី ជូ ប៊ុនអេង បន្ថែមថា ពួកគេចាញ់បោកមេខ្យល់ ទើបធ្លាក់ខ្លួនទៅនៅប្រទេសចិន ហើយរៀបការជាមួយជនជាតិចិននៅទីនោះ ។
ចំពោះការរៀបការក្លែងក្លាយក៏មានកើតឡើងលើស្ត្រីខ្មែរដែលទៅសហរដ្ឋអាមេរិក និងប្រទេសផ្សេងៗនៅអឺរ៉ុបផងដែរ ប៉ុន្តែលោកស្រីថា ស្ត្រីខ្មែរទាំងនោះ មិនបានរាយការណ៍មកអាជ្ញាធរនោះទេ ។
លោកស្រីបញ្ជាក់យ៉ាងដូច្នេះថា «ហើយក៏មិនមានន័យថាទៅប្រទេសដទៃមិនមានអាពាហ៍ពិពាហ៍ក្លែងក្លាយដែរ។ យើងក៏ធ្លាប់ដឹងដែរ សូម្បីតែទៅសហរដ្ឋអាមេរិក ប្រទេសអូស្ត្រាលី ឬមួយក៏ទៅប្រទេសនៅសហភាពអឺរ៉ុបមានពេលខ្លះ គេហៅអាពាហ៍ពិពាហ៍ក្លែងក្លាយដែរតើ។ ប៉ុន្តែពួកគាត់ច្រើនតែដោះស្រាយបញ្ហានៅប្រទេសគោលដៅហ្នឹងទៅ ហើយគាត់មិនដែលបានរាយការណ៍ត្រឡប់មកវិញពីរឿងការចង់ត្រឡប់មកស្រុកវិញទេ ពីព្រោះគាត់គ្រាន់តែធ្វើជាឈ្នាន់ដើម្បីបានទៅស្រុកគេ។ ប៉ុន្តែដូចនៅប្រទេសចិនអ៊ីចឹង ដោយសារគាត់រស់នៅទីនោះអត់បាន ដោយសារតែទំនៀមទម្លាប់ ឬមួយក៏ប្រពៃណីនៅក្នុងការរស់នៅក្នុងគ្រួសារវាខុសគ្នា ហើយទទួលសម្ពាធផ្លូវចិត្ត ផ្លូវកាយអីហ្នឹង គាត់នៅអត់បាន» ។
លោកស្រី ជូ ប៊ុនអេង ជំរុញឲ្យស្ត្រីខ្មែរដែលចង់រៀបការជាមួយជនបរទេស គួរដាក់ពាក្យទៅក្រសួងការបរទេស និងក្រសួងមហាផ្ទៃ ដែលនឹងមានការស៊ើបអង្កេតដើម្បីធានាថា ពួកគេមានសុវត្ថិភាព មិនចាញ់បោកការជួញដូរ ។
លោកស្រី បញ្ជាក់ថា ក្នុងឆ្នាំ២០១៩ មានការស្នើសុំរៀបអាពាហ៍ពិពាហ៍ជាមួយជនបរទេសចំនួន ២.៦៤១ គូ ប៉ុន្តែរដ្ឋាភិបាលអនុញ្ញាតចំនួន ២.០១៦គូ តែប៉ុណ្ណោះ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ មានប្រសាសន៍ថា៖ «អ៊ីចឹងយើងនៅពិនិត្យ ហើយបើសិនរកឃើញថា មិនទំនង យើងចង់និយាយថា ដែលគួរឲ្យសង្ស័យ គឺយើងមិនបានអនុញ្ញាតទេ ហើយសុំឲ្យគាត់វិលត្រឡប់ទៅបំពេញបែបបទវិញឲ្យបានត្រឹមត្រូវ» ។
សូមជម្រាបថា ស្ថានទូតចិនប្រចាំនៅកម្ពុជា មិនទាន់មានការការអត្ថាធិប្បាយ ណាមួយនៅឡើយទេ ពាក់ព័ន្ធករណីខាងលើនេះ ៕
