ខេត្តស្វាយរៀង ៖ អគ្គីភ័យមួយបានឆាបឆេះផ្ទះ របស់លោកក្រឡាបញ្ជីសាលាដំបូងខេត្តស្វាយរៀង ហើយភ្លើងបានឆេះទ្រព្យសម្បត្តិអស់គ្មានសល់ ។
ហេតុការណ៍ឆាបឆេះផ្ទះនេះបានកើតឡើងកាលពីវេលាម៉ោង០៦:០០នាទីល្ងាចថ្ងៃទី២៤ ឧសភា ឆ្នាំ២០២០ នៅចំណុច ភូមិស្រះវង់ សង្កាត់ស្វាយរៀង ក្រុងស្វាយរៀង ។
អគ្គិភ័យនេះ ឆេះផ្ទះទំហំ៨ម៉ែត្រគុណ១៦ម៉ែត្រ ធ្វើអំពីឈើ ដំបូលសង្ក័សី ជញ្ជាំងក្តា ខាងក្រោមថ្ម ជារបស់ជនរងគ្រោះមានឈ្មោះ ងួន រ៉ា ភេទប្រុស អាយុ៥០ ឆ្នាំ ជាក្រឡាបញ្ជីសាលាដំបូងខេត្តស្វាយរៀង រស់នៅក្នុងភូមិឃុំកើតហេតុខាងលើ ។
ពាក់ព័ន្ធនឹងករណីនេះ ត្រូវបានសមត្ថកិច្ចឱ្យដឹងថា មូលហេតុគឺបណ្តាលមកពីឆ្លងចរន្តអគ្គិសនី ទុស្សេខ្សែភ្លើងនៅក្នុងផ្ទះបាយ ។
បើតាមសាកក្សីនៅក្បែរកន្លែងកើតហេតុ បានឱ្យដឹងថា មុនពេលកើតហេតុម្ចាស់ផ្ទះ(ប្តី ប្រពន្ធនិងកូន) បានទៅធ្វើបុណ្យនៅស្រុកកំណើតនៅស្រុកស្វាយទាប រីឯកូនស្រី និងកូនប្រសា បាននាំកូនទៅចាក់ថ្នាំព្យាបាលជម្ងឺនៅមន្ទីរពេទ្យ ដោយឲ្យកូនស្រីម្នាក់អាយុ២៦ឆ្នាំ នៅចាំផ្ទះ ។
តាមប្រភពព័ត៌មាន បន្តថា ខណៈកូនស្រីម្នាក់ដែលនៅចាំផ្ទះ បានដាំស្ល ស្រាប់តែទុស្សេ ខ្សែភ្លើង ក្នុងផ្ទះបាយខាងក្រោយ ហើយនាងក៏បានរត់ចេញមកខាងមុខផ្ទះ ដើម្បីបិទបារ៉ែតភ្លើង ពេលនោះភ្លើងបានឆាបឆេះផ្ទះបាយ ហើយរាលដាលដល់ធុងហ្គាស ចំនួនពីរ ក៏ផ្ទុះយ៉ាងខ្លាំង បង្កជាអណ្តាតភ្លើងឆាបឆេះផ្ទះទាំងមូលយ៉ាងសន្ធោសន្ធៅ តែម្តង។
ភ្លាមៗ លោកស្នងការនគបាលខេត្តស្វាយរៀង បានបញ្ជារថយន្តពន្លត់អគ្គីភ័យរបស់ស្នងការចំនួន២គ្រឿង រថយន្តពន្លត់អគ្គីភ័យកងរាជអាវុធហត្ថខេត្ត២គ្រឿង ដោយប្រើប្រាស់ទឹកអស់១៥គ្រឿង ទើបអាចគ្រប់គ្រងស្ថានការណ៍បាន នៅវេលាម៉ោង៧ និង០០នាទីយប់ថ្ងៃដដែល ប៉ុន្តែ ជាអកុសលភ្លើងបានឆាបឆេះផ្ទះអស់ទាំងស្រុង រួមទាំងទ្រព្យសម្បត្តិ ប្រាក់រៀលចំនួន ១៥លានរៀល ប្រាក់ដុល្លារ ២០០០$ ប្លង់ដី និងសម្ភារប្រើប្រាស់មួយចំនួនទៀត ។
យ៉ាងណា មិនបង្កគ្រោះថ្នាក់ដល់នរណាម្នាក់នោះទេ ហើយក៏មិនបង្កឲ្យឆេះឆ្លងរាលដាលទៅដល់ផ្ទះអ្នកជិតខាងដែរ ៕
