បន្ទាយមានជ័យ ៖ កូនប្រុសម្នាក់គ្រាន់តែរឿងមិនទទួលទូរស័ព្ទ ខឹងបានសម្លាប់ឪពុកខ្លួនឯង ត្រូវបានសមត្ថកិច្ចតាមចាប់ខ្លួនបាននៅរសៀល ថ្ងៃទី២២ ខែឧសភា ឆ្នាំ២០២០ ។
ហេតុការណ៍នេះកើតឡើងកាលពីវេលាម៉ោង១១យប់ថ្ងៃទី២១ ខែឧសភា ឆ្នាំ២០២០ នៅត្រង់ចំណុច ភូមិគោកខ្ពស់ ឃុំគោកកឋិន ស្រុកថ្មពួក ខេត្តបន្ទាយមានជ័យ ។
បើតាមលោកឧត្ដមសេនីយ៍ត្រី សិទ្ធិ ឡោះ ស្នងការរងទទួលផែនការងារព្រហ្មទណ្ឌ ខេត្តបន្ទាយមានជ័យ បានប្រាប់ឲ្យដឹងថា ជនសង្ស័យឈ្មោះ ថន ធួន ភេទប្រុស អាយុ៣៥ឆ្នាំ ត្រូវជាកូនបង្កើតរបស់ជនរងគ្រោះឈ្មោះ នូវ ថន អាយុ៥៨ឆ្នាំ ។
លោកបន្តអោយដឹងថា គ្រាន់តែរឿងទូរស័ព្ទមកឪពុក ហើយឪពុកមិនលើកទូរស័ព្ទ ខឹងឈ្លោះប្រកែកពាក្យសម្តីជាមួយឪពុកបង្កើត ពេលឈ្លោះប្រកែកគ្នានោះ ម្តាយក៏បានហាមឃាត់កុំឲ្យឈ្លោះដែរ ស្រាប់តែកូនបង្កើត ខឹងទប់កំហឹងពុំបាន ឈានដល់យកអង្រែឈើ ប្រវែងប្រវែងប្រមាណ១.៣០ម៉ែត្រ វាយទៅលើឪពុកបណ្តាលឲ្យដួលសន្លប់ផ្កាប់មុខនឹងដី រួចហើយប្រពន្ធក៏បានបញ្ជូនទៅមន្ទីរពេទ្យ តែជាអកុសលដាច់ខ្យល់ស្លាប់តាមផ្លូវ តែម្តង ។
លោកបន្ថែមអោយដឹងទៀតថា រីឯជនសង្ស័យក្រោយធ្វើសកម្មភាពហើយ បានរត់គេចខ្លួនបាត់ទាំងយប់ ទើបកម្លាំងនគរបាលធ្វើការស្រាវជ្រាវឃាត់ខ្លួនបានជនសង្ស័យ នៅចំណុចភូមិតាបៅ ឃុំបុសស្បូវ ស្រុកព្រះនេត្រព្រះ ខេត្តបន្ទាយមានជ័យ ។
បច្ចុប្បន្នកម្លាំងជំនាញ កំពុងរៀបចំសំណុំរឿង បញ្ជូនទៅតុលាការ ដើម្បីចាត់ការតាមនីតិវិធីច្បាប់ ៕
