តៃវ៉ាន់ ៖ នៅក្នុងសេចក្ដីថ្លែងការណ៍ ក្រសួងការបរទេសអាមេរិក បានប្រកាសកាលពីថ្ងៃពុធថា សហរដ្ឋអាមេរិកបានយល់ព្រមលក់គ្រាប់មីស៊ីល(torpedoes) ដែលអាចបំពាក់លើនាវាមុជទឹក ឬជាប្រភេទមីស៊ីលប្រដេញក្នុងទឹក ចំនួន១៨គ្រាប់ទៅឲ្យកោះតៃវ៉ាន់ ក្នុងតម្លៃប្រមាណ ១៨០លានដុល្លារ ក្នុងទង្វើមួយដែលបង្កឱ្យចិនក្តៅស្លឹកត្រចៀក និងធ្វើឱ្យស្ថានភាពនៅតំបន់ច្រកសមុទ្រតៃវ៉ាន់ កាន់តែតានតឹង ។ នេះបើតាមសារព័ត៌មាន CNA ចេញផ្សាយនៅថ្ងៃទី២១ ខែឧសភា ឆ្នាំ២០២០ ។
ទោះបីជាយ៉ាងណា សហរដ្ឋអាមេរិក បានចាត់ទុកការលក់នេះ គឺជាប្រតិបត្តិការផ្តល់ផលប្រយោជន៍ឲ្យគ្នាទៅវិញទៅមក ។ ក្រសួងការបរទេស ប្រកាសថា “ការលក់នេះ បានបម្រើដល់ផលប្រយោជន៍ជាតិ សេដ្ឋកិច្ច និងសន្តិសុខរបស់សហរដ្ឋអាមេរិក ដោយគាំទ្រដល់កិច្ចខិតខំប្រឹងប្រែងរបស់អ្នកទទួលក្នុងការធ្វើទំនើបកម្មកងកម្លាំងប្រដាប់អាវុធរបស់ខ្លួន និងរក្សានូវសមត្ថភាពការពារ ដែលអាចជឿទុកចិត្តបាន” ។
ក្រសួង បានបន្ថែមថា ការលក់នេះនឹងជួយធ្វើឲ្យប្រសើរឡើងនូវសន្តិសុខរបស់អ្នកទទួល និងជួយក្នុងការរក្សាស្ថេរភាពនយោបាយ តុល្យភាពយោធា និងវឌ្ឍនភាពសេដ្ឋកិច្ចនៅក្នុងតំបន់ ។
ក្រសួងការបរទេសបានបញ្ជាក់ថា មីស៊ីល 18 MK-48 Mod6 ដែលអាចបាញ់ចេញពីនាវាមុជទឹក កំពុងត្រូវបានផ្គត់ផ្គង់ពីស្តុកដែលមានស្រាប់ របស់កងទ័ពជើងទឹកអាមេរិក ។
គួរបញ្ជាក់ថា ការប្រកាសលក់អាវុធខាងលើឱ្យកោះតៃវ៉ាន់ កើតមានឡើងក្នុងតែថ្ងៃមួយ ដែលលោកស្រី ត្សៃ អ៊ីងវិន (Tsai Ing-wen) ស្បថឡើងកាន់តំណែងជាប្រធានាធិបតីតៃវ៉ាន់ សម្រាប់អាណត្តិទី ២ របស់លោកស្រី ។ ទន្ទឹមគ្នានេះ ប្រធានាធិបតីអាមេរិកលោក Donald Trump បានបញ្ជាក់យ៉ាងច្បាស់ថា លោកនឹងបន្តការអនុវត្តបែបនេះទៀត ។ ជារឿយៗ ចិនតែងតែថ្កោលទោស ចំពោះការលក់អាវុធរបស់សហរដ្ឋអាមេរិក ឱ្យកោះតៃវ៉ាន់ ដែលខ្លួនចាត់ទុកគ្រាន់តែខេត្តមួយរបស់ចិនតែប៉ុណ្ណោះ ហើយចិន នឹងប្រើប្រាស់កម្លាំងយោធាបង្រួបបង្រួមជាតិ នៅក្នុងករណីដែល កោះតៃវ៉ាន់ហ៊ានប្រកាសឯករាជ្យ ។
កោះតៃវ៉ាន់ត្រូវបានគ្រប់គ្រងដាច់ដោយឡែកពីចិនដីគោក ចាប់តាំងពីឆ្នាំ១៩៤៩ មក បន្ទាប់ពីក្រុមអ្នកជាតិនិយមបានចាញ់សង្គ្រាមស៊ីវិល ក្រោមដៃពួកកុម្មុយនិស្ត ហើយបានភៀសខ្លួនទៅកាន់កោះនេះ ដើម្បីបង្កើតរដ្ឋាភិបាលដែលជាគូប្រជែង ។ យ៉ាងណាក៏ដោយ ទីក្រុងប៉េកាំងបានចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួនហើយបានប្តេជ្ញាថានឹងដណ្តើមកាន់កាប់ដោយកម្លាំង បើសិនជាចាំបាច់ ។ ទីក្រុងវ៉ាស៊ីនតោនបានកាត់ផ្តាច់ចំណងការទូតជាមួយទីក្រុងតៃប៉ិ ក្នុងឆ្នាំ១៩៧៩ ដើម្បីទទួលស្គាល់រដ្ឋាភិបាលទីក្រុងប៉េកាំងថា ជាស្ថាប័នគ្រប់គ្រងស្របច្បាប់តែមួយគត់របស់ចិន ប៉ុន្តែនៅតែជាអ្នកផ្គត់ផ្គង់អាវុធដ៏សំខាន់របស់កោះតៃវ៉ាន់ ៕