ខេត្តរតនគិរី ៖ ប្រជាពលរដ្ឋចំនួន២នាក់ ដែលមន្ត្រីបរិស្ថានខេត្តឃាត់ខ្លួនពីបទកាប់ទន្ទ្រានដីព្រៃក្នុងដែនជម្រកសត្វព្រៃលំផាត់និងកំពុងជាប់ឃុំខ្លួននៅពន្ធនាគារភ្នំស្វាយ បានស្លាប់បាត់បង់ជីវិតម្នាក់ ដោយសារមានជំងឺប្រចាំកាយ កាលពីព្រឹកថ្ងៃទី២០ ខែឧសភា ឆ្នាំ២០២០ ។
ជនត្រូវចោទទាំង២នាក់ ដែលមន្ត្រីបរិស្ថានចាប់ឃាត់ខ្លួន រួមមានទី១ ឈ្មោះ អ៊ំ ធា ភេទប្រុស អាយុ៥២ឆ្នាំ ជនជាតិខ្មែរ មានទីលំនៅភូមិសាមុទ្រក្រោម ឃុំសេដា ស្រុកលំផាត់ ។ និងទី២ ឈ្មោះ បិន ឈាង ភេទស្រី អាយុ៥៥ឆ្នាំ ជនជាតិខ្មែរ មានទីលំនៅភូមិកាឡែង ឃុំសេដា ស្រុកលំផាត់ បាន(ស្លាប់) មុនពេលដឹកបញ្ជូនទៅដល់មន្ទីរពេទ្យបង្អែកខេត្តរតនគិរី ។
លោក អ៊ុក គឹមជន ប្រធានពន្ធនាគារភ្នំស្វាយ បានបញ្ជាក់ប្រាប់អ្នកសារព័ត៌មានឲ្យដឹងថា ស្ត្រីដែលបានស្លាប់នោះគាត់មានជំងឺប្រចាំកាយ ដូចជាលើសឈាម និងទឹកនោមផ្អែមជាដើម និងបានធ្វើទុកខ្លាំង នៅព្រឹកថ្ងៃទី២០ ខែឧសភា ហើយបានស្លាប់តាមផ្លូវទៅកាន់មន្ទីរពេទ្យ ។
ដោយឡែកបើតាមលោកវេជ្ជបណ្ឌិត ហ៊ីង ផាន សុគន្ធា ប្រធានមន្ទីរពេទ្យបង្អែកខេត្តរតនគិរី នៅព្រឹកថ្ងៃទី២១ ឧសភានេះ បានឲ្យដឹងថា ស្ត្រីឈ្មោះ បិន ឈាង បានស្លាប់មុនពេលដឹកបញ្ជូនមកដល់មន្ទីរពេទ្យបង្អែកខេត្ត ។
សូមជម្រាបថា ក្រុមការងារបច្ចេកទេសវិទ្យាសាស្ត្រ នៃស្នងការដ្ឋាននគរបាលខេត្ត មន្ត្រីពន្ធនាគារភ្នំស្វាយ លោកវេជ្ជបណ្ឌិត និងមន្ត្រីនគរបាលប៉ុស្តិ៍មូលដ្ឋាន ដោយមានការសម្របសម្រួលពីលោក លាង អ៊ូ ព្រះរាជអាជ្ញារងអមសាលាដំបូងខេត្ត បានចូលរួមការធ្វើកោសល្យវិច័យលើសព ពុំមានឃើញស្លាកស្នាមអ្វីគួរឲ្យកត់សម្គាល់ឡើយ ។
ក្រោយពីធ្វើកោសល្យវិច័យរួចមក សមត្ថកិច្ចជំនាញបានធ្វើកំណត់ហេតុ និងបានប្រគល់សពទៅឲ្យក្រុមគ្រួសារ ដើម្បីយកទៅធ្វើបុណ្យនៅឯវត្តជំរុំ៣ស្រុក ក្នុងឃុំកាឡែង ស្រុកលំផាត់ ខេត្តរតនគិរី តាមប្រពៃណី ។
សូមរម្លឹកថា ជនត្រូវជាប់ចោទទាំង២នាក់ខាងលើ ស្ត្រីឈ្មោះ បិន ឈាង(ស្លាប់) និងឈ្មោះ អ៊ំ ធា ត្រូវបានមន្ត្រីបរិស្ថានខេត្តឃាត់ខ្លួន ពីបទកាប់រុករានដីព្រៃក្នុងដែនជម្រកសត្វព្រៃលំផាត់ កាលពីថ្ងៃទី២៧ កុម្ភៈ ២០២០ ។ ក្រោយមក មានប្រជាពលរដ្ឋប្រមាណជា ៥ភូមិ បានលើកគ្នាមកតវ៉ា នៅមុខមន្ទីរបរិស្ថានខេត្ត នៅថ្ងៃទី២៨ កុម្ភៈ ២០២០ ដើម្បីឲ្យមន្ត្រីបរិស្ថានទាំងនោះ ដោះលែងពួកគាត់ទាំង២នាក់វិញ ។ បន្ទាប់មកទៀត លោក លន់ សុភាព អភិបាលរងខេត្ត ទទួលបន្ទុកផ្នែកសម្របសម្រួល បានឲ្យប្រជាពលរដ្ឋចំនួន៨នាក់ ទៅកាន់សាលាខេត្ត ដើម្បីធ្វើការដោះស្រាយគ្នា ប៉ុន្តែជាលទ្ធផល មិនអាចរកដំណោះស្រាយបាន ៕