ភ្នំពេញ៖ ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ថា ក្រសួងនៅតែបន្តបិទសាលារៀននៅទូទាំងប្រទេស ប៉ុន្តែមិនអាចហួសពីខែវិច្ឆិកា នោះទេ ។ នេះបើយោងតាមលិខិតរបស់លោក ហង់ ជួនណារ៉ុន ដាក់សំណើរទៅកាន់សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា កាលពីថ្ងៃទី១២ ខែឧសភា ឆ្នាំ២០២០។
នៅក្នុងលិខិតនោះ លោក ហង់ ជួន ណារ៉ុន បានលើកឡើងថា៖«ខ្ញុំយល់ថា គ្រឹះស្ថានសិក្សាគ្រប់កម្រិតគ្រប់ប្រភេទគួរបន្តពន្យាពេលក្នុងការបើកដំណើរការឡើងវិញ ដើម្បីតាមដានស្ថានភាពជំងឺកូវីដ១៩ កុំឲ្យមានការឆ្លងនៅក្នុងសហគមន៍ ជាពិសេសបង្ការរលកទី២» ។
លោកបានបញ្ជាក់ទៀតថា ក្រសួងអប់រំបានតាមដានយ៉ាងយកចិត្តទុកដាក់ជាប្រចាំនៃការវិវត្តន៍នៃជំងឺកូវីដ១៩ នៅក្នុងប្រទេសកម្ពុជា ក្នុងតំបន់ និងសកលលោក ជាពិសេសនោះផលប៉ះពាល់ដោយជំងឺនេះលើវិស័យអប់រំទាំងសាធារណៈ និងឯកជន។ ហើយ ក្រសួងក៏បានដាក់ចេញវិធានការជាច្រើនផងដែរ ក្នុងការទប់ស្កាត់ជំងឺកូវីដ១៩ ។ លោករដ្ឋមន្ត្រីក៏បានលើកឡើងថា ក្រសួងមិនប្រងើយកណ្តើយចំពោះបញ្ហាសេដ្ឋកិច្ច និងការបើកឲ្យដំណើរការសាលារៀនឡើងវិញផងដែរ ៕