ខេត្តត្បូងឃ្មុំ៖ លោក វណ្ណ សុភានោ អគ្គនាយកក្រុមហ៊ុនអអេហ្វ៣វើលដ៍ ខេមបូឌា បានដឹកនាំក្រុមការងារទាំងអស់ចូលថ្វាយបង្គំ សាមណេរ ហ៊ុន ម៉ាណែត នាព្រឹកថ្ងៃអាទិត្យ៤រោច ខែពិសាខ ឆ្នាំជូត ទោស័ក ពុទ្ធសករាជ២៥៦៤ ត្រូវនឹងថ្ងៃទី១០ ខែឧសភា ឆ្នាំ២០២០ ដែលជាថ្ងៃចុងក្រោយនៃការសាងភ្នួស នៅក្នុងវត្តអម្ពរវ័ន្ត ហៅវត្តស្វាយដំណាក់ ស្ថិតក្នុងឃុំជីនីក ស្រុកក្រូចឆ្មារ ខេត្តត្បូងឃ្មុំ ។ នេះបើយោងតាមហ្វេសប៊ុក លោក វណ្ណ សុភានោ អគ្គនាយកក្រុមហ៊ុនអអេហ្វ៣វើលដ៍ ខេមបូឌា ។
ជាមួយគ្នានោះដែរ លោកអគ្គនាយកក្រុមហ៊ុនអអេហ្វ៣វើលដ៍ ខេមបូឌា មានទឹកចិត្តជ្រះថ្លាក្នុងវិស័យព្រះពុទ្ធសាសនា លោកក៏បានប្រគេនគ្រីម និងនាំយកបច្ច័យមួយចំនួន ដើម្បីចូលរួមកសាងសមិទិ្ធផលនានា លើវិស័យពុទ្ធចក្រ ក្នុងវត្តអម្ពរវ័ន្ត ហៅវត្តស្វាយដំណាក់ ស្ថិតក្នុងឃុំជីនីក ស្រុកក្រូចឆ្មារ ខេត្តត្បូងឃ្មុំផងដែរ ។
គួររំលឹកផងដែរថា នៅក្នុងពិធីសាសនា នៃពិធីបុណ្យតម្កល់សព អ្នកឧកញ៉ាព្រឹទ្ធមហា ឧបាសិកាធម្មញ្ញាណវិវឌ្ឍនា ប៊ុន ស៊ាងលី មាតាក្មេក សម្តេចតេជោ ហ៊ុន សែន មាតាបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កាលពីថ្ងៃទី៥ ឧសភា កន្លងទៅនេះ ព្រះតេជគុណ ហ៊ុន ម៉ាណែត ត្រូវបានជ្រើសរើសបួសមុខភ្លើង តំណាងឲ្យក្រុមគ្រួ សារ នៃសពអ្នកឧកញ៉ាព្រឹទ្ធមហា ឧបាសិកាធម្មញ្ញាណវិវឌ្ឍនា ។
សូមបញ្ជាក់ថា សាមណេរ ហ៊ុន ម៉ាណែត បានបួសមុខភ្លើងនៅថ្ងៃទី០៥ ខែឧសភា ឆ្នាំ២០២០ ក្នុងព្រពៃណីទំនៀមទម្លាប់ខ្មែរ បានចាត់ទុកការបួសមុខភ្លើង គឺជាការបង្ហាញនូវកតញ្ញូធម៌សម្រាប់អ្នកមានគុណដែលបានចែកឋាន ហើយក៏ជាសន្សំកុសលផលបុណ្យឧទ្ទិសជូនដល់វិញ្ញាណក្ខន្ធអ្នកធ្វើមរណកាលទៅផងដែរ៕
