តារាឆ្នើមជើងស៊ុតប្រចាំក្លឹបមាន់ខ្នាយមាស Tottenham Hotspur និងជាខ្សែប្រយុទ្ធជួរមុខប្រចាំក្រុមជម្រើសជាតិកូរ៉េខាងត្បូងកីឡាករ Son Heung Min ខណៈដែលការប្រកួតនៅក្របខ័ណ្ឌកំពូលអង់គ្លេស Premier League បានផ្អាកដោយសារជំងឺរាតត្បាត Covid-19 រួចមក កីឡាករកូរ៉េខាងត្បូងរូបនេះបានចូលបំពេញកាតព្វកិច្ចជាយោធានៅកោះ Jeju និងកំពុងហ្វឹកហាត់នៅក្នុងជំរុំយោធាដែលរដ្ឋាភិបាលបានតម្រូវ ។
យោងតាមច្បាប់របស់ប្រទេសកូរ៉េខាងត្បូងគ្រប់យុវជនដែលមានសុខភាពល្អត្រូវតែបំពេញកាតព្វកិច្ចជាយោធាមុនពេលឈានចូលអាយុ២៨ឆ្នាំ ដោយឡែកខ្សែប្រយុទ្ធ Son Heung Min ត្រូវបានរាជរដ្ឋាភិបាលកូរ៉េខាងត្បូងលើកលែងពីការចូលបម្រើយោធាអស់រយៈពេល២១ខែម្តងមកហើយក្រោយពីខ្សែប្រយុទ្ធរូបនេះបានជួយកូរ៉េខាងត្បូងឈ្នះមេដាយមាសកីឡាអាស៊ីឆ្នាំ២០១៨នៅប្រទេសឥណ្ឌូនេស៊ីរូចមក ។
ក្រោយពេលក្របខ័ណ្ឌ Premier League បានពន្យាពេលដោយសារតែជំងឺរាតត្បាត Covid-19 តារាឆ្នើមក្លឹបមាន់ក្នាយមាសរូបនេះបានវិលត្រឡប់ទៅកាន់ប្រទេសកំណើត (កូរ៉េខាងត្បូង) របស់ខ្លួនវិញចូលហ្វឹកហាត់ទាហានរយៈពេល៣សប្តាហ៍ដើម្បីបំពេញកាតព្វកិច្ចជាពលរដ្ឋល្អរបស់កូរ៉េខាងត្បូង ។
តារាឆ្នើមជើងស៊ុតវ័យ២៧ឆ្នាំរូបនេះនឹងត្រូវហ្វឹកហាត់អំពីការប្រើប្រាស់អាវុធយុទ្ធភ័ណ្ឌ លក្ខខណ្ឌសង្គ្រាម និងការហ្វឹកហាត់កាយសម្បទា ហើយរូបគេនឹងត្រូវប្រឈមមុខជាមួយសារធាតុរបស់អាវុធគីមី អាវុធជីវសាស្ត្រ រលកវិទ្យុសកម្ម និងនុយក្លេអ៊ែរថែមទៀតផង ។ អ្វីដែលពិបាកបំផុតសម្រាប់ Son គឺការប្រឈមមុខជាមួយនឹងការបាញ់ឧស្ម័នបង្ហូរទឹកភ្នែក និងរត់ចម្ងាយ៣០គីឡូម៉ែត្រ ។
មន្ត្រីផ្នែកហ្វឹកហាត់នៅឯជំរុំកងទាហានរបស់កូរ៉េខាងត្បូងបានប្រាប់កាសែត The National ថា ៖«នៅពេលអ្នកជាទាហាន អ្នកគួរតែចេះបាញ់កាំភ្លើង និងចេះដកដង្ហើមនៅទីកន្លែងដែលមានផ្សែងហ្គាស ឬឧស្ម័នបង្ហូរទឹកភ្នែក និងចូលរួមក្នុងការប្រយុទ្ធរាប់បញ្ជូលទាំងការរត់ និងលូនជុំវិញសមរភូមិ» ៕
