យោងតាមប្រភពសារព័ត៌មាន Soccer Laduma បានចេញផ្សាយថា កីឡាករឆ្នើមសញ្ជាតិប្រេស៊ីល Neymar Jr បាននិយាយថា រូបគេហាក់អស់សង្ឃឹមក្នុងការវិលត្រឡប់ទៅកាន់ក្លឹបអ្នកមានបុណ្យ FB Barcelona វិញ ដោយកីឡាកររូបនេះបានបដិសេធទទួលយកទឹកប្រាក់បន្ថែមចំនួន៩៩លានផោនដែលក្លឹបអ្នកមានបារាំង Paris Saint-Germain ផ្តល់ឱ្យនៅក្នុងកុងតាថ្មី ។
កីឡាករឆ្នើមប្រចាំក្រុមជម្រើសជាតិសាំបាប្រេស៊ីលវ័យ២៨ឆ្នាំរូបនេះបានពន្យាពេលក្នុងការចុះកុងត្រាថ្មីជាមួយក្លឹបអ្នកមានបារាំង PSG បើទោះបីជាក្លឹបសុខចិត្តបន្ថែមនូវទឹកប្រាក់ពីលើចំនួន៩៩លានផោនជូនកីឡាករខ្សែប្រយុទ្ធរូបនេះក៏ដោយ ។
Neymar បានចូលរួមជាមួយក្លឹប PSG ដែលជាម្ចាស់ជើងឯក Ligue 1 ប្រចាំលីគកំពូលបារាំង កាលពីឆ្នាំ២០១៧ ដោយបំបែកកំណត់ត្រាកីឡាករដែលមានតម្លៃខ្លួនថ្លៃបំផុតក្នុងវិស័យបាត់ទាត់ ក្រោយពីរូបគេបានចំណាយពេលបួនរដូវកាលជោគជ័យជាមួយក្លឹបអ្នកមានបុណ្យ FB Barcelona រួចមក ។
ទោះបីជា Neymar មានចិត្តចង់វិលត្រឡប់ទៅកាន់ក្លឹបចាស់របស់ខ្លួនវិញក៏ដោយ តែក្លឹបអ្នកមានបារាំង PSG នៅតែប្រើគ្រប់វិធីសាស្ត្រក្នុងការរក្សាគ្រាប់ពេជ្ររបស់ពួកគេដែលមានកីឡាករ Neymar និង Kylian Mbappe ឱ្យនៅបន្តជាមួយក្លឹប ។
ទោះបីជាយ៉ាងណាក៏ដោយ Neymar បានសម្រេចចិត្តបដិសេធការផ្តល់ជូនពិសេសរបស់ក្លឹបអ្នកមានបារាំង PSG ដោយចិញ្ចឹមចិត្តសង្ឃឹមថា អាចវិលត្រឡប់ទៅកាន់ទ្រនំចាស់ក្លឹបអ្នកមានបុណ្យ FC Barcelona របស់ខ្លួនវិញ ៕
ប្រភព ៖ Soccer Laduma
