ទីក្រុងតូក្យូ ៖ យោងតាមប្រភពគេហទំព័រសារព័ត៌មាន Gulf News ដែលបានចេញផ្សាយកាលពីថ្ងៃទី០៦ ខែឧសភា ឆ្នាំ២០២០ បានឱ្យដឹងថា ការទប់ស្កាត់ការរីករាលដាលនៃជំងឺឆ្លង Covid-19 នេះគឺអាស្រ័យលើការដឹងថា តើមនុស្សដែលបានឆ្លងជំងឺនេះ និងអ្នកដែលពួកគេបានទាក់ទងនៅទីណាដើម្បីឱ្យពួកគេអាចធ្វើតេស្ត និងពិនិត្យព្យាបាលបាន ។
ចំពោះក្មេងប្រុសជំទង់ដែលទើបតែមានវ័យ១៦ឆ្នាំម្នាក់ដែលមានឈ្មោះថា Syu Kato បានបង្កើតស្នាដៃដ៏គួរឱ្យភ្ញាក់ផ្អើលមួយលើការបង្កើតកម្មវីធីមួយអាចឱ្យអ្នកប្រើប្រាស់ដឹងអំពីរបៀលរក្សាគម្លាតពីគ្នាដើម្បីចៀសវាងការឆ្លងនូវមេរោគ Covid-19 បាន ។
Kato បានបង្កើតកម្មវិធីសូហ្វវែរ iPhone មួយដែលប្រើប្រព័ន្ធ GPS ដើម្បីឱ្យបុគ្គលម្នាក់ៗអាចរក្សាកំណត់ត្រានៃកន្លែងស្នាក់នៅរបស់ខ្លួននៅក្នុងទូរស័ព្ទដៃរបស់ពួកគេបានដើម្បីជួយក្នុងការតាមដានពីទំនាក់ទំនងរបស់ពួកគេជាមួយនឹងអ្នកដទៃ ។
កម្មវិធីដែលក្មេងប្រុសរូបនេះបានបង្កើតឡើងមានឈ្មោះថា «Asiato» ជាប្រភេទកម្មវិធីដាក់ឱ្យទាញយកហ្វ្រីដែឡមាននៅលើតែ App Store ប៉ុណ្ណោះ និងអាចធ្វើការតម្លើងបាននៅលើទូរស័ព្ទ iPhone គ្រប់ប្រទេស តែវាតម្រូវឱ្យទូរស័ព្ទ iPhone របស់អ្នកត្រូវមាន iOS Version ចាប់ពី 13.2 ឡើងទៅ ។
កម្មវិធីដែលក្មេងប្រុសខាងលើបានបង្កើតឡើងនេះមានលក្ខណៈពិសេសអាចរក្សាទុកនូវទីតាំងដែលអ្នកធ្លាប់ទៅដោយប្រើប្រព័ន្ធ GPS ដើម្បីតាមដានទីតាំងរបស់អ្នកប្រើប្រាស់ក្នុងចម្ងាយបរិវេណ១០ម៉ែត្រ ឬច្រើនជាងនេះ ហើយវានឹងរក្សាទីតាំងនោះទុកក្នុងទូរស័ព្ទអ្នកប្រើប្រាស់ ។ កម្មវិធីនេះអាចរក្សាទិន្នន័យឯកជនរបស់អ្នកប្រើប្រាស់ទុកនៅក្នុងទូរស័ព្ទរបស់ពួកគេដោយមិនអនុញ្ញាតិឱ្យមានការចែករំលែកដោយស្វ័យប្រវត្តិនោះទេ ។
ប្រសិនបើមនុស្សម្នាក់ត្រូវបានគេរកឃើញថា មានឆ្លងនូវជំងឺ Covid-19 សូហ្វវែរថ្មីដែលក្មេងប្រុសនេះបានបង្កើតឡើងនឹងធ្វើការកំណត់ទីតាំងដែលពួកគេបានស្ថិតនៅក្នុងរយៈពេលកន្លងមក ដើម្បីអាចឱ្យពួកគេទៅរកទីតាំងនោះដោយខ្លួនឯង និងអាចដឹងថាមនុស្សណាខ្លះដែលពួកគេបានទំនាក់ទំនងដោយផ្ទាល់ជាមួយពួកគេនៅពេលនោះ ហើយថែមទាំងអស់ផ្តល់ដំណឹងដល់ អាជ្ញាធរសុខភាពក្នុងការចុះតាមដានអ្នកដែលជុំវិញបរិវេណនោះថែមទៀតផង ៕