បន្ទាយមានជ័យ ៖ មន្ត្រីគយចល័តប្រចាំខេត្តបន្ទាយមានជ័យ រួមជាមួយមន្ត្រីពេទ្យសត្វ នៃមន្ទីរកសិកម្មខេត្ត បានសហការគ្នា បង្ក្រាបផលិតផលសាច់ជ្រូកមានទម្ងន់សរុប ៤.៥ តោន ដែលលួចនាំចូលពីប្រទេសថៃ ។
ប្រតិបត្តិការបង្ក្រាបការដឹកជញ្ជូនផលិតផលសាច់ជ្រូកដោយខុសច្បាប់នេះ ធ្វើឡើងកាលពីយប់ថ្ងៃទី៥ ឧសភា ២០២០ ស្ថិតលើលើផ្លូវជាតិលេខ៥ ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
លោក ឡេង សុភ័ត្រា មន្ត្រីគយចល័តប្រចាំនៅខេត្តបន្ទាយមានជ័យ បានឲ្យដឹងកាលពីថ្ងៃ ទី៦ ឧសភានេះថា ផលិតផលសាច់ជ្រូកនោះបានផ្ទុកក្នុងរថយន្តឃ្លុបក្លាស្ស៊រ១គ្រឿង ដែលបើកបរពីព្រំដែនថៃ ចូលមកក្នុងខេត្តបន្ទាយមានជ័យ គ្មានច្បាប់អនុញ្ញាត ហើយខុសនឹងលក្ខណៈបច្ចេកទេសលើការវេចខ្ចប់ ប៉ះពាល់ដល់គុណភាព និងសុវត្ថិភាពដល់អ្នកបរិភោគ ។
ក្រោយឆែកឆេរ កម្លាំងជំនាញរកឃើញ សាច់ជ្រូក ឆ្អឹងជំនីជ្រូក និងគ្រឿងក្នុងជ្រូក ចំនួន ៧៥កេស ដែលមានទម្ងន់ស្មើនឹង ៤.៥០០ គីឡូក្រាម ។ ផលិតផលសាច់ជ្រូកទាំងនេះ ត្រូវដឹកយកទៅដុតកម្ទេចចោល នៅភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ នារសៀលថ្ងៃនេះ ។
ចំណែកឯ អ្នកបើករនិងម្ចាស់រថយន្ត ត្រូវបាន មន្ត្រីជំនាញហៅមកធ្វើកំណត់ហេតុ ផងដែរ ៕
