ក្លឹបយក្សអាល្លឺម៉ង់ Bayern Munich កំពុងតែខិតជិតក្នុងកិច្ចព្រមព្រៀងនាំយកតារាឆ្នើមសញ្ជាតិអាល្លឺម៉ង់រស់ក្លឹបមេឃខៀវ Manchester City កីឡាករ Leroy Sane ទៅកាន់ទឹកដី Allianz Arena សម្រាប់កុងត្រារយៈពេល៥ឆ្នាំ ។ នេះបើយោងតាមប្រភពទីភ្នាក់ងារសារព័ត៌មាន Sport Bild ដែលត្រូវបានគេហទំព័រសារព័ត៌មាន Goals ធ្វើការដកស្រង់ចេញផ្សាយនៅថ្ងៃទី០៦ ខែឧសភា ឆ្នាំ២០២០ នេះ ។
ខ្សែបម្រើស្លាបរបស់ក្រុមជម្រើសជាតិឥន្ទ្រីដែកអាល្លឺម៉ង់ និង Man City រូបនេះនឹងចូលរួមជាមួយក្លឹបយក្ស Bayern Munich ក្នុងយុទ្ធនាការដណ្តើមពាន Bundesliga នារដូវកាលក្រោយ តែនៅមិនទាន់មានប្រភពណាមួយបញ្ជាក់ឱ្យដឹងសម្រាប់តម្លៃខ្លួនក្នុងការផ្ទេរចេញពីក្លឹបមេឃខៀវ Man City ទៅកាន់ក្លឹប Bayern Munich ប៉ុន្មាននៅឡើយនោះទេ ។
សូមរំលឹកផងដែរថា កីឡាករឆ្នើមសញ្ជាតិអាល្លឺម៉ង់រូបនេះត្រូវបានក្លឹប Bayern Munich តាមទិញជាយូរមកហើយ ប៉ុន្តែមួយរយៈចុងក្រោយមកនេះរូបគេក៏មិនសូវជាបានបង្ហាញខ្លួនសម្រាប់ក្រុមមេឃខៀវ Manchester City នោះទេដោយសារតែបញ្ហារបួសជង្គង់របស់គេ ៕