រាជធានីភ្នំពេញ ៖ ក្រុមវេជ្ជបណ្ឌិតចិន ចំនួន៧នាក់ ដែលបានមកប្រទេសកម្ពុជា ចូលរួមទប់ស្កាត់ជំងឺកូវីដ១៩នោះ លោកវេជ្ជបណ្ឌិតជំនាញម្នាក់ បានផ្តល់យោបល់ថា ខែមេសានេះជាពេលដែលប្រទេសកម្ពុជាអបអរពិធីបុណ្យចូលឆ្នាំថ្មី ដូច្នេះគឺជាដំណាក់កាលសំខាន់បំផុត សម្រាប់ទប់ទល់នឹងមេរោគដ៏សាហាវនេះ ។
វេជ្ជបណ្ឌិតចិនលោក Ai Xiang និយាយថា សម្រាប់កម្ពុជា ខែមេសានេះ គឺដំណាក់កាលសំខាន់តែម្តង សម្រាប់ទប់ទល់នឹងមេរោគដ៏សាហាវនេះ ព្រោះថា បើយើងធ្វេសប្រហែស និងយល់ឃើញថា បើមានអ្នកឆ្លង ក៏មិនសូវច្រើនទេ បើប្រៀបធៀបជាមួយប្រទេសមួយចំនួន ហើយចង់ឆ្លៀតឱកាសចូលឆ្នាំថ្មី ជួបជុំជាមួយមិត្តភក្តិ បងប្អូន ញាតិសន្តាន ក្រុមគ្រួសារនោះ នឹងមានហានិភ័យធំណាស់ សម្រាប់ឆ្លងមេរោគ ជាលក្ខណៈសហគមន៍ តែម្តង ។
វេជ្ជបណ្ឌិត Ai Xiang និយាយបន្តថា បើមានការឆ្លងមេរោគជាលក្ខណៈសហគមន៍មែននោះ ចំនួនមនុស្សឆ្លងនឹងផ្ទុះយ៉ាងលឿន ហេតុដូច្នេះសង្ឃឹមថា ប្រជាជនខ្មែរគ្រប់រូប គួរតែយកចិត្តទុកដាក់ និងប្រុងប្រយ័ត្នជាចំបង ។ សូមយកប្រទេសចិន ជាឧទាហរណ៍ ពេលមេរោគកូវិដ១៩ បានផ្ទុះឡើង គឺចំនឹងពិធីបុណ្យចូលឆ្នាំចិន ។
វេជ្ជបណ្ឌិតជំនាញ និងមានបទពិសោធន៍ស្រាប់ លោកបានបញ្ជាក់ថា សង្ឃឹមថាប្រជាជនខ្មែរ ក៏អាចទ្រាំនៅផ្ទះ ក្នុងបុណ្យចូលឆ្នាំថ្មីនេះ ។ យើងនៅផ្ទះអត់ជួបជុំគ្នា តែលើកនេះ ការពារអាយុជីវិតយើង ចាំផុតគ្រាលំបាកនេះ យើងពិតជានឹងមានឱកាសសប្បាយរីករាយច្រើន ។ យើងអត់ជួបជុំគ្នាក្នុងពេលចូលឆ្នាំខ្មែរខាងមុខនេះ ដើម្បីការពារខ្លួនផង ការពារក្រុមគ្រួសារផង ការពារអ្នកផ្សេងផង រហូតដល់ការពារប្រជាជនខ្មែរទាំងអស់តែម្តង ៕
