ការងារជុំវិញពិភពលោកបាត់បង់១០ភាគរយហើយ កំពុងបាត់បន្តបន្ទាប់រាល់ថ្ងៃ មនុស្សជិតបួនពាន់លាននាក់កំពុងបង្ខាំងជាប់ក្នុងផ្ទះ កត្តាទាំងនេះហើយ នាំឲ្យកម្មវិធីស្បៀងអាហារពិភពលោក World Food Program បានព្រមានថា ភាពអត់ឃ្លានអាចធ្ងន់ធ្ងរជាងឆ្លងជំងឺកូវីដ១៩ ទៅទៀត ។
កម្មវិធីស្បៀងអាហារពិភពលោក គឺជាសាខាជំនួយស្បៀងអាហាររបស់អង្គការសហប្រជាជាតិ និងអង្គការមនុស្សធម៌ធំបំផុតរបស់ពិភពលោក ដែលដោះស្រាយភាពអត់ឃ្លាន និងលើកកម្ពស់សន្តិសុខស្បៀង ។
មន្ត្រីជាន់ខ្ពស់ នៃកម្មវិធីស្បៀងអាហារពិភពលោក បាននិយាយនៅថ្ងៃសុក្រនេះថា W.F.P តែងតែប្រឹងដោះស្រាយការផ្គត់ផ្គង់ ពេលគ្រោះរាំងស្ងួត ឬវិបត្តិសេដ្ឋកិច្ច ប៉ុន្តែពេលនេះ ជំងឺរាតត្បាតអាចគំរាមកំហែង ដល់ការផ្គត់ផ្គង់ស្បៀងអាហារ សម្រាប់មនុស្សរាប់រយលាននាក់ ដែលភាគច្រើនកំពុងរស់នៅក្នុងទ្វីបអាហ្វ្រិក ។
លោក Arif Husain សេដ្ឋវិទូ នៅឯកម្មវិធីស្បៀងអាហារពិភពលោក បានព្រមានថា វិបត្តិនេះធំ សូម្បីតែរំពឹងទុកក៏លំបាក ។
នៅក្នុងរបាយការណ៍ថ្មី នៅថ្ងៃនេះ អង្គការជំនួយស្បៀងអាហាររបស់អង្គការសហប្រជាជាតិ បាននិយាយថា សម្រាប់ប្រទេសក្រីក្រជាច្រើន ផលវិបាកសេដ្ឋកិច្ច នឹងកាន់តែធ្ងន់ធ្ងរ ជាងការឆ្លងជំងឺនេះទៅទៀត ។ មនុស្សជាច្រើនចាប់ផ្តើមគ្មានអ្វីហូបទៅហើយ ។
ទោះបីទ្វីបអាហ្វ្រិក ដែលនឹងជួបការខ្វះស្បៀងជាងគេក៏ដោយ ក៏អ្នកជំនាញផ្នែកធនធានមនុស្សជឿជាក់ថា នៅទីដទៃទៀត ការងារកាន់តែច្រើនថែមឡើងនឹងត្រូវបាត់បង់ជារៀងរាល់ថ្ងៃ រហូតដល់អត្រាគ្មានការងារធ្វើមានជិត១០% គ្រាន់តែពិភពលោកចាប់ផ្តើមចលាចលនៃជំងឺរាតត្បាត ៕