រាជធានីភ្នំពេញ ៖ នាយកដ្ឋានប្រឆាំងបទល្មើសបច្ចេកវិទ្យា បានអោយដឹងថា ក្រុមហ៊ុន Google បានចាប់ផ្ដើមផ្សាយរបាយការណ៍ទិន្នន័យទីតាំងអ្នកប្រើប្រាស់ ដើម្បីជួយបង្ការនិងទប់ស្កាត់ការរាតត្បាតនៃជំងឺកូវីដ១៩ ។
ចាប់ផ្តើមពីថ្ងៃសុក្រ ទី០៣ ខែមេសា ក្រុមហ៊ុន Google បានចាប់ផ្ដើមចុះផ្សាយទិន្នន័យទាក់ទងនឹងទីតាំងអ្នកប្រើប្រាស់ (Community Mobility Reports) ដើម្បីជួយអាជ្ញាធរនៃប្រទេសនីមួយៗងាយស្រួលក្នុងការអង្កេតចំនួនមនុស្សក្នុងតំបន់ទាក់ទងនឹងការរាតត្បាតនៃជំងឺកូវីដ-១៩។
របាយការណ៍នេះបង្ហាញពីទីតាំងរបស់អ្នកប្រើប្រាស់ ដែលបានឯកភាពបើកសិទ្ធឱ្យក្រុមហ៊ុន ទាញយកទិន្នន័យទីកន្លែង (Location) របស់ពួកគេ ប៉ុន្តែទិន្នន័យផ្ទាល់ខ្លួនរបស់អ្នកប្រើប្រាស់នឹងពុំត្រូវបានបង្ហាញជាសាធារណៈនោះទេ ។
លោកស្រី Jen Fitzpatrick ដែលជាអ្នកដឹកនាំរៀបចំកម្មវិធីនេះ បាននិយាយថា ក្រុមហ៊ុនទាញយកទិន្នន័យពីផែនទីរបស់ Google ហើយបង្ហាញពីកម្រិតចំនួនមនុស្សនៅក្នុងតំបន់អាជីវកម្មនីមួយៗ ដែលទិន្នន័យនេះវាមានអត្ថប្រយោជន៍ណាស់សម្រាប់អាជ្ញាធរផ្នែកសុខាភិបាល ធ្វើសេចក្តីសម្រេចចិត្ត ក្នុងការប្រឆាំងនឹងជំងឺកូវីដ-១៩។
បច្ចុប្បន្នរបាយការណ៍នេះមានសម្រាប់ ១៣១ប្រទេស ដោយផ្ដល់ឱ្យជាប្រភេទឯកសារ PDF ដែលធ្វើឱ្យមានភាពងាយស្រួលក្នុងការចែកចាយ ហើយងាយយល់ដោយដាក់បង្ហាញទីតាំងផ្សេងៗគ្នាចែកជា៦ប្រភេទ ដូចជា ៖
១-កន្លែងកម្សាន្ត ផ្សារ សារមន្ទីរ បណ្ណាល័យ រោងភាពយន្ត…
២-ហាងទំនិញ ឱសថស្ថាន
៣-សួនឧទ្យាន សួនកម្សាន្តសាធារណៈ ឆ្នេរសមុទ្រ ផ្លាសា…
៤-ស្ថានីយធ្វើដំណើរសាធារណៈ ចំណតរថយន្តក្រុង ស្ងានីយរថភ្លើង…
៥-កន្លែងការងារ
៦-កន្លែងស្នាក់នៅ ឬលំនៅឋាន
ជាឧទាហរណ៍ នៅកម្ពុជា របាយការណ៍នេះបង្ហាញថា អំឡុងសប្តាហ៍មុន ចំនួនអ្នកនៅក្នុងតំបន់ កន្លែងកម្សាន្ត និង ផ្សារ មានការថយចុះ ៤៣% សួនឧទ្យានមានការថយចុះ ៣១% ចំណែកឯកន្លែងស្នាក់នៅមានការកើនឡើង១២% ។ នេះបញ្ជាក់ថាប្រជាពលរដ្ឋយើងបានកាត់បន្ថយការចេញពីផ្ទះ ដែលជាសញ្ញាដ៏ល្អមួយក្នុងការកាត់បន្ថយឆ្លងនៃជំងឺកូវីដ-១៩។
ហេតុផលសំខាន់ដែលធ្វើឱ្យក្រុមហ៊ុន Google ធ្វើបែបនេះ ក៏ព្រោះតែចង់ឱ្យអាជ្ញាធរអាច ចាត់វិធានការទៅលើកការចល័ត ឬប្រមូលផ្តុំរបស់មនុស្សនៅកន្លែងណាមួយ មានគ្នាច្រើនពេក ឬក៏អាចជាការកំណត់ប្តូរម៉ោងក្នុងការដើរហើរខ្លះ ក៏ដូចជាអាចបិទកន្លែងណាមួយជាដើម ដើម្បីបញ្ជៀសការចេញដើរ និងទៅកន្លែងតែមួយ ក្នុងពេលដំណាលគ្នាច្រើនពេក ដែលទាំងនេះក៏ជាការជួយក្នុងការបង្ការ និងទប់ស្កាត់ការរីករាលដាលនៃជំងឺ កូវីដ-១៩ បានផងដែរ ៕
