រាជធានីភ្នំពេញ ៖ នៅព្រឹកថ្ងៃទី២៦ ខែមីនានេះ មន្ត្រីជំនាញ នៃអគ្គនាយកដ្ឋានកាំកុងត្រូល បានចុះប្រតិបត្តិការឆែកឆេរ នៅតាមឱសថស្ថាននានាពិសេសឱសថស្ថានធំៗចំនួន៤ទីតាំង រួមមាននៅម្តុំផ្សារអូឡាំពិក ម្តុំផ្សារតាប៉ាង ផ្សាទំនើបម៉ាក្រូ និងផ្សារទំនើបអ៊ីអនសែនសុខ ដើម្បីស្វែករកនូវផលិតផល ម៉ាស់ និងអាកុល សម្រាប់លាងសំអាតដៃ ដែលគ្មានគុណភាព និងលក់ក្នុងតម្លៃថ្លៃ ជូនដល់ប្រជាពលរដ្ឋ ឆ្លៀតឱកាសដែលវីរុសកូវីដ១៩ (COVIT-19) កំពុងរីករាលដាលនេះ ។
នេះបើយោងតាមផេកទូរទស្សន៍ជាតិកម្ពុជា អោយដឹងថា ស្របពេលប្រតិបត្តិការត្រួតពិនិត្យនេះ មន្ត្រីជំនាញបាននាំយកនូវអាកុល និងម៉ាស់មួយចំនួន មកធ្វើការពិសោធន៍ និងបានធ្វើការណែនាំអោយម្ចាស់ទីតាំង ឱសថស្ថាន រឺហ្វាម៉ាស៊ីទាំងអស់ ចូលរួមសហការជាមួយមន្ត្រីជំនាញ តាមរយៈការលក់នៅផលិតផលដែលមានគុណភាព និងមានយីហោ ច្បាស់លាស់ ជាមួយ និងការរក្សាតម្លៃអោយបានសមរម្យ ដើម្បីជាការចូលរួម ចំណែកជួយដល់ប្រជាពលរដ្ឋ ប្រយុទ្ធប្រឆាំង បង្ការ ទប់ស្កាត់ នូវវីរុសកូវីដ១៩ COVIT-19 ដែលកំពុងរីករាលដាលនៅកម្ពុជា ។
សូមបញ្ជាក់ផងដែរថា ឱសថស្ថានដែលលក់ម៉ាសសង្កត់កពលរដ្ឋ ថ្លៃហួសហេតុប្រឈមនឹងការបិទអាជីវកម្ម លែងឲ្យដំណើរការរកស៊ីអស់មួយជីវិត !
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជម្រាបជូនជាសាធារណជនថា សម្តេចកំពុងសិក្សាលើវិធានការច្បាប់ដើម្បីដាក់បទបញ្ជារឹបអូសម៉ាស់ដែលកំពុងលក់ក្នុងតម្លៃថ្លៃខ្ពស់ហួសហេតុសង្កត់កប្រជាពលរដ្ឋនៅតាមទីផ្សារ និងឱសថស្ថានមួយចំនួន ហើយឈានទៅបិទឱសថស្ថានទាំងនោះលែងឲ្យដំណើរការរកស៊ីអស់មួយជីវិត ។
សម្តេចថ្លែងបែបនេះ នៅព្រឹកថ្ងៃពុធ ទី២៥ ខែ មីនា ឆ្នាំ២០២០ ក្នុងពិធីសំណេះសំណាលជាមួយយុវគ្រូពេទ្យស្ម័គ្រចិត្តចំនួន ៤២២នាក់ នៅវិមានសន្តិភាព មុនចេញហ្វឹកហ្វឺន និងបំពេញបេសកកម្មជាមួយក្រសួងសុខាភិបាល ដើម្បីប្រយុទ្ធប្រឆាំងទប់ស្កាត់ជំងឺកូវីឌ-១៩ (COVID-19) ។
វិធានការដ៏តឹងរឹងនេះ គឺដើម្បីកុំអោយឱសថស្ថានទាំងនោះដំឡើងថ្លៃម៉ាស់លក់សង្កត់កពលរដ្ឋតទៅទៀតជាពិសេសនៅក្នុងស្ថានភាពដែលប្រទេសជាតិកំពុងប្រយុទ្ឋប្រឆាំងនឹងទប់ស្កាត់ជំងឺឆ្លងកូវីឌ-១៩ ៕