ក្រុងហ្សឺណែវ៖ អង្គការសុខភាពពិភពលោកហៅកាត់ថា WHO បានប្រកាសថា នៅក្នុងទ្វីបអឺរ៉ុប រយៈពេល ២៤ម៉ោងចុងក្រោយនេះ បានធ្វើតេស្តរកឃើញមានមនុស្សសរុប ១៧,៥០៦នាក់ទៀត មានផ្ទុកវីរុសកូរ៉ូណាថ្មី (COVID-19) ដែលធ្វើឲ្យចំនួនអ្នកឆ្លងជំងឺរាតត្បាតសាកលក្នុងទ្វីបនេះ កើនឡើងដល់ ១០៤,៥៩១ករណី ក្នុងនោះអ្នកជំងឺសរុប ៤,៨៩៩នាក់ បានស្លាប់។
នេះបើតាមការផ្សាយរបស់ទីភ្នាក់ងារព័ត៌មានចិនស៊ីនហួរ នាព្រឹកថ្ងៃសៅរ៍ ទី២១ ខែមីនា ឆ្នាំ២០២០នេះ។
អង្គការសុខភាពពិភពលោក (WHO) បានឲ្យដឹងថា គិតត្រឹមម៉ោង ២៣៖៥៩នាទីយប់ថ្ងៃសុក្រ (ម៉ោងសាកល) តួលេខអ្នកឆ្លង និងបាត់បង់ជីវិតថ្មីៗទៀត នៅតាមបណ្តាប្រទេសអឺរ៉ុប ត្រូវបានបូកបញ្ចូលបន្ថែមពីលើតួលេខចាស់។ សម្រាប់រយៈពេលពេញមួយថ្ងៃ គឺថ្ងៃសុក្រម្សិលមិញនេះ អ្នកឆ្លង COVID-19 បន្ថែមទៀតមានចំនួន ១៧,៥០៦នាក់ និងស្លាប់ ៨១៦នាក់។
នៅក្នុងទ្វីបអឺរ៉ុប បណ្តាប្រទេសដែលកំពុងរងគ្រោះធ្ងន់ជាងគេនោះគឺ អ៉ីតាលី អេស្ប៉ាញ បារាំង និងអាល្លឺម៉ង់ ដោយប្រទេសទាំង ៤ នេះសុទ្ធតែមានករណីឆ្លងលើស ១០,០០០ករណីរៀងៗខ្លួន ហើយបើបូកចូលគ្នាវិញ គឺស្មើនឹងជាង ៨០,០០០ករណី ក្នុងនោះអ្នកជំងឺសរុប ៤,៥៦៦នាក់ស្លាប់។
ដោយឡែកចំនួនអ្នកឆ្លង COVID-19 សរុបនៅទូទាំងពិភពលោកមានជាង ២៣០,០០០ករណី ក្នុងនោះស្លាប់សរុបជាង ៩,០០០នាក់។
អង្គការសុខភាពពិភពលោក WHO នៅតែបន្តអំពាវនាវឲ្យពិភពលោកទាំងអស់បង្កើនកិច្ចខិតខំប្រឹងប្រែទ្វេដង និងធ្វើអ្វីៗគ្រប់យ៉ាងទាំងអស់ដែលអាចទៅរួច ដើម្បីបញ្ឈប់ការឆ្លងរាលដាល COVID-19 និងសង្គ្រោះជីវិតមនុស្សជាតិ៕
