បរទេស៖ ក្រុមហ៊ុនផលិតរថយន្ដ ហុងដា(Honda) តូយូ៉តា(Toyota) នីសាន់(Nissan) បានប្រកាសឲ្យដឹងថា រោងចក្ររបស់ពួកគេនៅសហរដ្ឋអាមេរិក នឹងបញ្ឈប់ការផលិតក្នុងគោលបំណងជួយបញ្ឈប់ការរីករាលដាលនៃវីរុស Covid-19។ នេះបើយោងតាមសារព័ត៌មាន CNN ដែលបានចុះផ្សាយនាថ្ងៃទី២០ ខែមីនា ឆ្នាំ២០២០។
យោងតាមការអះអាងរបស់នាយកក្រុមហ៊ុននីមួយៗបានប្រកាសពីថ្ងៃផ្អាករថយន្ដ ដូចខាងក្រោម៖
ក្រុមហ៊ុនតូយូ៉តា(Toyota) នឹងបញ្ឃប់រាល់ការផលិតរថយន្ដគ្រប់ប្រភេទនៅសហរដ្ឋអាមេរិក ចាប់ពីថ្ងៃទី ២៣ ខែមីនារហូតដល់ថ្ងៃទី ៣ ខែមេសា ឆ្នាំ២០២០។
ក្រុមហ៊ុននីសាន់(Nissan) កំពុងផ្អាកផលិតកម្មនៅរោងចក្រអាមេរិក របស់ខ្លួនចាប់ពីថ្ងៃសុក្រ ខែមីនានេះ រហូតដល់ថ្ងៃទី ៦ ខែមេសា ឆ្នាំ២០២០។
ក្រុមហ៊ុនហុងដា(Honda) បានផ្អាកការផលិតអស់រយៈពេល៦ថ្ងៃ ដោយចាប់ផ្តើមពីថ្ងៃទី២៣ ខែមីនា ឆ្នាំ២០២០។ ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា បុគ្គលិកក្រុមហ៊ុនហុងដា ចំនួន២៧ ៦០០នាក់ នៅអាមេរិកខាងជើង នឹងរងផលប៉ះពាល់ហើយផលិតកម្មនឹងធ្លាក់ចុះប្រហែល ៤០ ០០០ គ្រឿងក្នុងកំឡុងពេលនោះ ៕
គួរបញ្ជាក់ដែរថា បច្ចុប្បន្ន រដ្ឋទាំង៥០ នៅក្នុងសហរដ្ឋអាមេរិក សុទ្ធតែមានករណីឆ្លង COVID-19 គិតមកត្រឹមព្រឹកថ្ងៃទី២០ មីនានេះ អ្នកឆ្លងកើនដល់ ១៤,៣៤០ករណី ចំនួនអ្នកស្លាប់ ២១៧នាក់ និងអ្នកត្រូវបានព្យាបាលអោយជាសះស្បើយមានចំនួន ១២៥នាក់ ៕
