ប៉េកាំង ៖ ការស្រាវជ្រាវនៅទីក្រុងវ៉ូហាន និងទីក្រុងស៊ីនជិន បង្ហាញថា អ្នកជំងឺដែលមានក្រុមឈាមប្រភេទ A មានអត្រាឆ្លងខ្ពស់ ហើយទំនងជាមានរោគសញ្ញាធ្ងន់ធ្ងរថែមទៀតនៅផ្ទុកវីរុសកូវីដ-១៩ បើធៀបនឹងអ្នកដែលមានក្រុមឈាមប្រភេទ O មានការថយចុះហានិភ័យយ៉ាងខ្លាំង នេះបើតាម South China Morning Post ។
គួរជម្រាបថា ក្រុមឈាមរបស់មនុស្សយើង ត្រូវបានបែកចែកជា ០៤ ក្រុមធំៗ គឺ A, B, AB និង O ដោយបន្ថែម RhD ជាសញ្ញា (+) និង (-) ថែមទៀត ដូច្នេះក្រុមឈាមមានដល់ ០៨ក្រុម ហើយក្រុមឈាមនីមួយៗ ត្រូវបានកំណត់ដោយហ្សែន ដែលអ្នកទទួលបានពីឪពុកម្តាយ ។
អ្នកដែលមានប្រភេទឈាម A អាចងាយនឹងឆ្លងជំងឺនេះ បង្កដោយ វីរុសកូវីដ-១៩ ខណៈពេលដែលអ្នកដែលមានប្រភេទ O ហាក់ដូចជាមានភាពធន់ នឹងជំងឺនេះ បើយោងតាមការសិក្សាបឋមពីអ្នកជំងឺនៅក្នុងប្រទេសចិន ដែលបានឆ្លងវីរុសCovid-19 ។
ក្រុមអ្នកស្រាវជ្រាវផ្នែកវេជ្ជសាស្ត្រ នៅប្រទេសចិន បានយកគំរូ ក្រុមឈាមរបស់អ្នកជំងឺជាង ២.០០០ នាក់ ដែលឆ្លងវីរុស នៅក្រុងវ៉ូហាននិងស៊ីនជិន ហើយប្រៀបធៀបពួកគេទៅនឹងប្រជាជន ដែលមានសុខភាពល្អក្នុងតំបន់ ។ ក្រុមអ្នកស្រាវជ្រាវបានរកឃើញថាអ្នកជំងឺមានក្រុមឈាម A បង្ហាញអត្រាឆ្លងខ្ពស់ ហើយអ្នកជំងឺហាក់ដូចជាវិវត្តទៅជារោគសញ្ញាធ្ងន់ធ្ងរជាងមុន ។
ក្រុមអ្នកស្រាវជ្រាវមជ្ឈមណ្ឌលវេជ្ជសាស្ត្រ នៃសាកលវិទ្យាល័យវូហាន ដែលដឹកនាំដោយវេជ្ជបណ្ឌិត វ៉ាង ស៊ីងហួន (Wang Xinghuan) នៅមន្ទីរពេទ្យហ្សុងណាន បានអោយដឹងថា ប្រជាជនចិន មានក្រុមឈាម A ប្រហែលជាត្រូវការ ការពារខ្លួនខ្លាំង ដើម្បីកាត់បន្ថយឱកាស នៃការឆ្លងវីរុសប្រភេទថ្មីនេះ និងការព្យាបាលយ៉ាងប្រុងប្រយ័ត្ន ។
វេជ្ជបណ្ឌិត វ៉ាង ស៊ីងហួន បន្តថា ផ្ទុយទៅវិញ “មនុស្សក្រុមឈាម O មានហានិភ័យឆ្លងជំងឺនេះ តិចណាស់ បើប្រៀបធៀបទៅនឹងក្រុមឈាមមិនមែន O” នេះបើយោងតាមការចុះផ្សាយមួយទៀត នៅលើគេហទំព័រ Medrxiv.org កាលពីថ្ងៃទី១១ ខែមីនា ។
ក្នុងចំណោម អ្នកជំងឺ ២០៦ នាក់ ដែលបានស្លាប់ ដោយសារកូវីដ-១៩ ក្នុងទីក្រុងវ៉ូហាន មាន ៨៥នាក់ មានក្រុមឈាមប្រភេទ A (ស្មើ ៦៣%) និង ៥២នាក់ មានក្រុមឈាមប្រភេទ O ក្រៅពីហ្នឹង គឺក្រុមឈាមប្រភេទផ្សេងៗ ។
ការសិក្សានេះ ត្រូវបានធ្វើឡើងដោយក្រុមស្រាវជ្រាវវេជ្ជសាស្ត្រ មកពីទីក្រុងនានានៅទូទាំងប្រទេសចិន រួមមានទីក្រុងប៉េកាំង វូហាន សៀងហៃនិងស៊ីនសិន ប៉ុន្តែមិនត្រូវបានពិនិត្យឡើងវិញទេ ។
ទោះជាយ៉ាងនេះក្តី ក៏មានអ្នកជំនាញ ព្រមានថា វាអាចមានគ្រោះថ្នាក់ដែលពាក់ព័ន្ធនឹងការប្រើប្រាស់ការសិក្សាខាងលើនេះ ដើម្បីអនុវត្តជាក់ស្តែងនាពេលបច្ចុប្បន្ន ។
លោក Gao Yingdai អ្នកស្រាវជ្រាវមកពីមន្ទីរពិសោធន៍រដ្ឋ ផ្នែករោគវិទ្យា នាទីក្រុងធានជីន មានប្រសាសន៍ថា គួរតែសិក្សាអោយធំជាងនេះ ទោះបីចំនួន ២,០០០នាក់ វាមិនតិចក៏ដោយ ប៉ុន្តែពេលនេះចំនួនអ្នកជំងឺសរុបដែលឆ្លងវីរុស មានចំនួនជាង ១៨០.០០០ នាក់ នៅទូទាំងពិភពលោក ។
នេះមិនមានន័យថា អ្នកមានឈាមប្រភេទ A ពិតជានឹងត្រូវឆ្លងមេរោគ១០០ភាគរយទេ ។ ចំណែកអ្នកមានក្រុមឈាមប្រភេទ O ក៏មិនមែនមានន័យថា សុវត្ថិភាព១០០ភាគរយដែរ ។ ចំណុចមួយផ្សេងទៀត នៃការស្រាវជ្រាវ គឺថា វាមិនបានផ្តល់ការពន្យល់ច្បាស់លាស់ អំពីអន្តរកម្មម៉ូលេគុល រវាងវីរុស និងកោសិកាឈាមក្រហមផ្សេងៗ នៅឡើយទេ ៕