ភ្នំពេញ៖ វាជារឿងដែលមនុស្សគ្រប់គ្នានឹកស្មានមិនដល់ ក្រោយពីមានការជួបជុំរវាងបងប្អូនស្រី២នាក់ ដែលមានអាយុ ៩៨ ឆ្នាំនិង ១០១ឆ្នាំ បានជួបជុំគ្នាជាលើកដំបូងក្នុងរយៈពេល៤៧ឆ្នាំ បន្ទាប់ពីពួកគេគិតម្នាក់ទៀតបានស្លាប់ក្នុងរបបខ្មែរក្រហមឆ្នាំ១៩៧០ ។ នេះបើយោងតាមការចុះផ្សាយរបស់សារព័ត៌មាន BBC កាលពីថ្ងៃទី២១ ខែកុម្ភៈ ឆ្នាំ២០២០។
យោងតាមប្រភពព័ត៌មានដដែលបានឲ្យដឹងថា បងប្អូនស្រីទាំង២ បានជួបគ្នាចុងក្រោយនៅឆ្នាំ១៩៧៣ គឺ ២ ឆ្នាំមុនពេលការកាន់អំណាចរបស់ខ្មែរក្រហមដែលដឹកនាំដោយប៉ុលពត។ លោកយាយប៊ុន សែន ដែលជាប្អូនស្រី គឺលោកយាយមិនដែលនឹកគិតថា បានជួបបងស្រីរបស់ខ្លួនឡើងវិញសោះ។
ដោយសារតែការប្រឹងប្រែងស្រាវជ្រាវរបស់បុគ្គលិកអង្គការ CCF។ គាត់មិនត្រឹមតែបានជួបបងស្រីវ័យ១០១ឆ្នាំនៅឡើយ ប៉ុន្តែក៏បានជួបប្អូនប្រុសវ័យ៩២ឆ្នាំ ដែលកំពុងរស់រានមានជីវិតផងដែរ ដោយពួកគាត់រស់នៅក្នុងខេត្តកំពង់ចាម។
លោកយាយប៊ុន សែន បានបាត់បង់ស្វាមីរបស់ខ្លួននៅក្រោមរបបប៉ុលពត ដែលត្រូវបានផ្តួលរំលំនៅឆ្នាំ ១៩៧៩ ហើយទីបំផុតលោកយាយក៏បានមករស់នៅក្បែរកន្លែងចាក់សំរាមស្ទឹងមានជ័យ ដ៏ល្បីល្បាញនៅក្នុងរាជធានីភ្នំពេញ។
អស់រយៈពេលជាយូរឆ្នាំមកហើយលោកយាយបានចំណាយដើររើសសំរាមដោយស្វែងរករបស់របរដែលអាចយកទៅកែច្នៃឡើងវិញ ហើយបានយកទៅលក់ដើម្បីយកលុយមកមើលថែទាំកុមារនៅក្នុងសង្កាត់ក្រីក្រ លោកយាយត្រូវបានលោក ស្កុត នីសុន (Scott Neeson) ស្ថាបនិក CCF បានចាត់ទុកលោកយាយ ប៊ុន សែន ជាដូនដ៏អស្ចារ្យម្នាក់ ហើយក៏ជាមនុស្សចំណាស់ដំបូងដែលគាត់បានជួបនៅស្ទឹងមានជ័យកាលពីឆ្នាំ២០០៤ផងដែរ ៕
