បរទេស៖ អាជ្ញាធរសុខាភិបាលខេត្តហ៊ូប៉ី ប្រទេសចិន ដែលជាចំណុចកណ្តាលនៃប្រភពវីរុសកូវីដប្រភេទថ្មី COVID-19 បានរាយការណ៍ថាមានអ្នកស្លាប់ថ្មីចំនួន៥៧នាក់។ បើគិតត្រឹមម៉ោង៨ ព្រឹកថ្ងៃសៅរ៍ ទី២២ ខែកុម្ភៈ នេះដែលសរុបចំនួននៅទូទាំងពិភពលោកមនុស្សស្លាប់ទាំងអស់កើនដល់២ ២៥១នាក់ ខណៈចំនួនអ្នកឆ្លងកើនដល់៧៦ ៨០៦នាក់។ នេះបើយោងតាមការចុះផ្សាយរបស់សារព័ត៌មាន South China Morning Post។
អ្នកស្លាប់ដោយវីរុសកូវីដ COVID-19 ភាគច្រើនបំផុតនៅក្រុងវូហាន ខេត្តហ៊ូប៉ី ហើយតំបន់រដ្ឋបាលពិសេសចិន គឺហុងកុងមាន២ករណី និងតៃវ៉ាន់មាន១ករណី។ក្រៅពីចិន មាននៅអ៊ីរ៉ង់២ករណី ជប៉ុន៣ករណី (អ្នកដំណើរលើនាវា Diamond Princess ២ករណី) ហើយក្រោយមកស្លាប់ទាំង២នាក់ បន្ទាប់មកមាន បារាំង ជប៉ុន កូរ៉េខាងត្បូង និងហ្វីលីពីន អ៊ីតាលី ដែលមាន១ករណីរៀងៗខ្លួន។
គួរឲ្យដឹងដែរថា បុរសវ័យ៧៨ឆ្នាំម្នាក់ ក្លាយជាអ្នកមនុស្សដំបូងនៅអ៊ីតាលី ដែលបានទទួលមរណភាព ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) កាលពីថ្ងៃសុក្រ។ នេះបើតាមការផ្សាយរបស់ទូរទស្សន៍រដ្ឋអ៊ីតាលី RAI។
ជាមួយគ្នានេះផងដែរ អ្នកជំងឺជាង១២ ០០០នាក់នាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់ និងប្រមាណជាង១៨ ៦៣១នាក់ដូចគ្នា បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។ នេះបើតាមបច្ចុប្បន្នភាពនៃទិន្នន័យរបស់គណៈកម្មាធិការសុខាភិបាលជាតិចិន។
ដើម្បីទប់ស្កាត់ការរីករាលដាលយ៉ាងឆាប់រហ័សអាជ្ញាធរចិន បានប្រកាសបិទទ្វារទីក្រុងប្រមាណជាង ៨០ នៅក្នុងខេត្តជិត ២០ ចាប់តាំងពីការរីករាលដាលនៃជំងឺនេះ។ វិធានការណ៍តឹងរ៉ឹងរួមមានការគ្រប់គ្រងចលនារបស់អ្នកស្រុកនិងយានយន្តនិងការរឹតត្បិតការចូលទៅកាន់សហគមន៍លំនៅដ្ឋាននិងសមាសធាតុនានាកំពុងត្រូវបានអនុវត្តនៅទូទាំងប្រទេស ៕