រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចូលរួមអបអរសាទរចំពោះរដ្ឋាភិបាលចិន ដែលក្រុមវេជ្ជបណ្ឌិតចិនបានប្រកាសរកឃើញឱសថព្យាបាលមេរោគ COVID-19 ។
សម្តេចអគ្គមហាសេនាបតីតេជោ ហ៊ុន សែន ថ្លែងបែបនេះ នៅក្នុងពិធីប្រគល់សញ្ញាបត្រដល់គរុសិស្ស គរុនិស្សិត បញ្ចប់ការសិក្សា ឆ្នាំ២០១៨-២០១៩ សរុប១,៩៧៧នាក់ នារី៨១៥នាក់ នៅវិទ្យាស្ថានជាតិអប់រំ រាជធានីភ្នំពេញ ។
សម្តេចបានបន្ថែមថា កាលពីម្សិលមិញរដ្ឋាភិបាលចិន បានប្រកាសរកឃើញឱសថព្យាបាលជំងឺនេះបាន ដោយប្រើប្រាស់ថ្នាំព្យាបាលជំងឺគ្រុនចាញ់ ។ ដូច្នេះ ប្រសិនបើព័ត៌មាននេះពិត ហើយអាចព្យាបាលជំងឺនេះជា មែននេះ សភាពការណ៍នឹងអាចរំលត់ក្នុងរយៈពេលដ៏ខ្លីខាងមុខ ។
សូមជម្រាបថា បើតាមទីភ្នាក់ងារព័ត៌មានចិន ស៊ីនហួរ ចេញផ្សាយថ្ងៃទី១៧ កុម្ភៈ ២០២០នេះ អោយដឹងថា ក្រុមគ្រូពេទ្យចិនប្រកាសថា(ថ្នាំប្រឆាំងជំងឺគ្រុនចាញ់) មានប្រសិទ្ធភាពសម្លាប់វីរុសកូរ៉ូណាបាន ។
ថ្លែងនៅក្នុងសន្និសីទសារព័ត៌មានកាលពីព្រឹកថ្ងៃចន្ទនេះ ក្រុមអ្នកជំនាញវេជ្ជសាស្ត្រចិន បានឯកភាពគ្នាជាឯកច្ឆន្ទ ថាឱសថ ក្លូរ៉ូគីន ផូស្វាត (Chloroquine Phosphate) នឹងត្រូវបានដាក់បញ្ចូលក្នុងកម្មវិធីវេជ្ជសាស្ត្រ ក្នុងការព្យាបាល អ្នកឆ្លងវីរុសកូវីដ១៩ COVID-19 ហើយការព្យាបាលតាមវីធីនេះ នឹងធ្វើឡើងក្នុងពេលឆាប់ៗនេះតាមដែលអាចធ្វើទៅបាន» ៕