ភ្នំពេញ៖ កាលពីថ្ងៃទី៩ ខែកុម្ភៈ ឆ្នាំ២០២០ លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានថ្លែងក្នុងពិធីចុះហត្ថលេខាលើអនុស្សរណៈយោគយល់គ្នា រវាងគណៈកម្មាធិការប្រយុទ្ធប្រឆាំងផលិតផលក្លែងក្លាយ និងសហព័ន្ធវិនិយោគិនកម្ពុជា បានឲ្យដឹងថាផលិតផលក្លែងក្លាយប្រមាណជាង១០០តោន ដែលបង្ក្រាបបាននៅរាជធានីភ្នំពេញ នឹងត្រូវដុតចោល នៅដើមខែមីនា និងប្រមាណ១០តោន នៅចុងខែកុម្ភៈនេះ។ នេះបើតាមទីភ្នាក់ងារព័ត៌មានកម្ពុជា(AKP)។
អនុស្សរណៈនេះ ផ្ដោតសំខាន់លើកិច្ចសហប្រតិបត្តិការ ក្នុងការប្រយុទ្ធប្រឆាំងការនាំចូល ការផលិត និងការចែកចាយផលិតផលឱសថ គ្រឿងសម្អាងក្លែងក្លាយខុសច្បាប់ នាំចូលដោយគ្មានអាជ្ញាបណ្ណ រំលាភលើកម្មសិទ្ធិបញ្ញា រំលោភលើសិទ្ធិនាំចូលផ្ដាច់មុខនៅកម្ពុជា។នេះបើតាមការលើកឡើងរបស់លោក មៀច សុផាន់ណា។
ចំណែកឯ លោក ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមអ្នកលក់ឱសថកម្ពុជា បានបញ្ជាក់ដែរថា ការចុះអនុស្សរណៈយោគយល់គ្នានេះ មិនត្រឹមតែផ្ដល់អត្តប្រយោជន៍ដល់អ្នកប្រើប្រាស់ប៉ុណ្ណោះទេ គឺថែមទាំងការពារអ្នកវិនិយោគសុចរិត និងបង្កបរិយាកាសប្រកួតប្រជែងដោយស្មោះត្រង់ផងដែរ ៕