បរទេស៖ អនុរដ្ឋមន្ត្រីនៃគណៈកម្មការសុខាភិបាលជាតិចិន លោក Zeng Yixin បានរាយការណ៏ថា វីរុសកូវីដ COVID 19 បានរាលដាលឆ្លងដល់បុគ្គលិកពេទ្យប្រមាណ ១ ៧១៦នាក់ និង៦នាក់ បានបាត់បង់ជីវិតដោយសារជំងឺរលាកសួតប្រភេទថ្មី។ ការអះអាងនេះបានធ្វើឡើងនាថ្ងៃទី១៤ ខែកុម្ភៈ ឆ្នាំ២០២០ នេះបើយោងតាមសារព័ត៌មាន South China Morning Post។
លោក Zeng Yixin ថ្លែងក្នុងសន្និសីទកាសែតមួយស្តីអំពីការការពារបុគ្គលិកសុខាភិបាលពីកូរ៉ូណាវីរុសប្រភេទថ្មី ឲ្យដឹងថា ចំនួនបុគ្គលិកពេទ្យ ដែលឆ្លងជំងឺ COVID-19 គឺបានកើនឡើងគួរឲ្យកត់សម្គាល់។ មន្ត្រីជាន់ខ្ពស់ផ្នែកសុខាភិបាលចិនរូបនេះ បានលើកឡើងថា បុគ្គលិកសុខាភិបាលចំនួន ១៧១៦នាក់ បានកើតជំងឺនេះ និង ៦នាក់ផ្សេងទៀត បានស្លាប់គិតត្រឹមថ្ងៃទី១២ ខែកុម្ភៈ។
ការឆ្លងវីរុសប្រភេទថ្មីលើបុគ្គលិកសុខាភិបាលជាបន្តបន្ទាប់ និងមានចំនួនច្រើនបែបនេះ គឺបណ្តាលមកពីវិបត្តិខ្វះម៉ាស់ និងសម្ភារការពារសម្រាប់បុគ្គលិកសុខាភិបាលនៅក្នុងប្រទេសចិន។ ពាក់ព័ន្ធនឹងបញ្ហាខ្វះសម្ភារការពារទាំងនេះ គឺកើតឡើងដោយសារតែ រដ្ឋាភិបាលចិន បានពន្យារពេលឈប់សម្រាកដល់ប្រជាជនចិនទាំងអស់ចាប់តាំងពីថ្ងៃចូលឆ្នាំចិនមកម្លេះ ដើម្បីទប់ស្កាត់ការរីកសាយភាយជំងឺ COVID-19 និងតម្រូវការខ្ពស់របស់ប្រជាជនចិន ក្នុងការប្រើប្រាស់សម្ភារទាំងនោះ។
គួរបញ្ជាក់ដែលថា រហូតមកដល់ពេលនេះ រោងចក្រផលិតម៉ាសមួយចំនួននៅចិន បានបើកដំណើរការវិញហើយ ប៉ុន្តែរោងចក្រទាំងនោះ បើកដំណើរការត្រឹមតែមួយផ្នែកប៉ុណ្ណោះ ពីព្រោះតែវីរុសកូវីដ COVID 19 បានរាលដាលកាន់តែខ្លាំងឡើងជាពិសេសនៅក្នុងខេត្តហ៊ូប៉ីន និងទីក្រុងវូហាន ដែលជាចំនុចកណ្ដាលនៃប្រភពវីរុសបានផ្ទុះឡើង ៕
