ខេត្តក្រចេះ ៖ យុវជនប្រុសស្រី ១ក្រុមមានគ្នាចំនួន៦នាក់ បានទៅលេងទឹកទន្លេមេគង្គ តំបន់ខ្សាច់ដុះ បណ្ដាលឲ្យលង់ទឹកទាំង៦នាក់ ប៉ុន្តែសំណាងល្អមាន៣នាក់បានជិះតោងពោង(ពោះវៀនកង់ឡាន) ទើបរួចពីផុតជីវិត ហើយ៣នាក់ទៀត បានលង់ទឹកស្លាប់ ខណៈសាកសព២នាក់បានរកឃើញ និងម្នាក់ទៀត បាត់ខ្លួននៅឡើយ ។
ហេតុការណ៍លង់ទឹកទន្លេមេគង្គនេះ បានកើតឡើងកាលពីល្ងាចថ្ងៃទី១៣ កុម្ភៈ ២០២០ នៅចំនុចភូមិថ្មី២ ឃុំខ្សាច់អណ្ដែត ស្រុកឆ្លូង ខេត្តក្រចេះ ។
លោកអធិការនគរបាលស្រុកឆ្លូង បានឲ្យដឹងថា ជនរងគ្រោះដែលបានស្លាប់ មានទី១ឈ្មោះ ធិន ភក្ត្រា ភេទប្រុស អាយុ១៩ឆ្នាំ និងជនរងគ្រោះទី២ឈ្មោះ ឡេ ចាន់រក្សា ភេទស្រី អាយុ១៤ឆ្នាំ ជនជាតិខ្មែរ រស់នៅភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះដូចគ្នា ។
ដោយឡែកជនរងគ្រោះ ដែលបាត់ខ្លួន មានឈ្មោះ ខុន ធារ៉ា ភេទស្រី អាយុ១៤ឆ្នាំ រស់នៅភូមិព្រែកសំរោង ឃុំខ្សាច់អណ្ដែត ស្រុកឆ្លូង ខេត្តក្រចេះ ។
បច្ចុប្បន្ន មន្ត្រីនគរបាលជំនា បានពិនិត្យសាកសពជនរងគ្រោះទាំង២ឃើញថា ពិតជាស្លាប់ដោយសារ លង់ទឹកពិតប្រាកដមែន ហើយសាកសពទាំង២នាក់ ត្រូវបានសមត្ថកិច្ចប្រគល់ជូនក្រុមគ្រួសារនៃសព យកទៅធ្វើបុណ្យ តាមប្រពៃណី ៕