ភ្នំពេញ៖ នាយប់ថ្ងៃទី១៣ ខែកុម្ភៈ ឆ្នាំ២០២០ មន្ត្រីក្រសួងសុខាភិបាលបានអះអាងថា លទ្ធផលនៃការពិនិត្យវិភាគសំណាកផ្លូវដង្ហើមលើករណីសង្ស័យចំពោះអ្នកទេសចរណ៍មកតាមកប៉ាល់ Westerdam ចំនួន២០នាក់បានបង្ហាញថាអវិជ្ជមានគឺគ្មានវីរុស Covid -19 ទេ ។
ការប្រកាសនេះបានធ្វើឡើងក្រោយពីក្រសួងសុខាភិបាល បានបញ្ជូនវត្ថុសំណាកទៅមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា ដើម្បីធ្វើរោគវិនិច្ឆ័យ ហើយលទ្ធផលនៃការពិនិត្យវិភាគសំណាកផ្លូវដង្ហើមលើករណីសង្ស័យចំពោះអ្នកទេសចរណ៍មកតាមកប៉ាល់ Westerdam ចំនួន២០នាក់ដែលថាមានបញ្ហាសុខភាពបន្តិចបន្តួចដូចជាវិលមុខនិងបញ្ហាក្រពះ ពោះវៀនខ្លះនោះ ខាងវិទ្យាស្ថានប៉ាស្ទ័រកម្ពុជាបង្ហាញថា ពួកគេពិតជាគ្មានផ្ទុកវីរុស Covid -19 ទេ។
រដ្ឋាភិបាល បានសម្រេចឱ្យនាវាទេសចរណ៍អាមេរិក ដែលមានឈ្មោះថា Westerdam ចូលចតនៅកំពង់ផែស្វយ័តខេត្តព្រះសីហនុ នៅថ្ងៃទី១៣ កុម្ភៈនេះ ក្រោយពីប្រទេស និងកោះចំនួន៥ បានបដិសេធលើការស្នើសុំចតរបស់ក្រុមហ៊ុន Holland America Line។ ក្នុងនោះរួមមាន ជប៉ុន តៃវ៉ាន់ កោះហ្គាម ហ្វីលីពីន និងថៃ ដែលមិនអនុញ្ញាតឱ្យនាវាទេសចរណ៍ចូលចតឡើយ ដោយសារបារម្ភពី COVID-19។
មនុស្សនៅលើនាវានោះ មានជាង២២០០នាក់ ក្នុងនោះអ្នកដំណើរ១៤៥៥នាក់ មានជាង៤០សញ្ជាតិ និងបុគ្គលិកបម្រើការងារតាមផ្នែកលើនាវា ៨០២នាក់។ អ្នកទេសចរដែលច្រើនជាងគេមាន អាមេរិកមាន៦៥១នាក់ កាណាដា ២៧១នាក់ អង់គ្លេស ១២៧នាក់ ហូឡង់៩១នាក់ អូស្ត្រាលី៧៩នាក់ អាល្លឺម៉ង់៥៧នាក់…៕