ហាណូយ ៖ អាជ្ញាធរវៀតណាមបាននិយាយថា អ្នកភូមិនៅឃុំ Son Loi ក្នុងប្រទេសវៀតណាម ដែលមានមនុស្សប្រមាណជា ១ម៉ឺននាក់ ត្រូវបានដាក់ឲ្យនៅដោយឡែកពីគេ ស្ថិតនៅក្រោមការត្រួតពិនិត្យ បន្ទាប់ពីបានរកឃើញមានអ្នកឆ្លងវីរុសកូរ៉ូណា ចំនួន៦ករណីក្នុងឃុំនេះ នេះបើតាមchannelnewsasia ។
ភូមិជាច្រើនជាតំបន់កសិកម្ម ក្នុងឃុំសុនឡយ Son Loi ក្នុងខេត្តវិញហ្វ៊ុក មានចម្ងាយ៤០គីឡូម៉ែត្រ ពីទីក្រុងហាណូយ ត្រូវបិទការចេញ-ចូលទាំងស្រុង នៅថ្ងៃព្រហស្បតិ៍នេះ ប៉ុន្តែបើចង់ចេញ-ចូល ត្រូវឆ្លងកាត់មន្ត្រីចត្តាឡីស័ក ធ្វើការត្រួតពិនិត្យអាការៈកំដៅក្នុងខ្លួនជាមុនសិន ។
យោងតាមរដ្ឋមន្ត្រីក្រសួងសុខាភិបាលវៀតណាម បានឲ្យដឹងថា “ចាប់ពីថ្ងៃទី១៣ ខែកុម្ភៈនេះ យើងនឹងអនុវត្ដបន្ទាន់នូវការបិទរាំងខ្ទប់អ្នកភូមិនានា ក្នុងឃុំ Son Loi ដែលមានការឆ្លងវីរុសកូរ៉ូណា COVID-19 ហើយរយៈពេលនៃការបិទ គឺចំនួន២០ថ្ងៃ” ។
មន្ត្រីដដែលបញ្ជាក់ថា ពីមុន មានអ្នកភូមិ៥នាក់ ក្នុងឃុំសុនឡយ បានឆ្លងវីរុស ហើយនៅថ្ងៃព្រហស្បតិ៍នេះ បានរាយការណ៍មានករណីទី៦ ។
ប៉ូលិសវៀតណាម រួមនឹងអាជ្ញាធរ និងមន្ត្រីពេទ្យ(ចត្តាឡីស័ក) កាលពីថ្ងៃព្រហស្បតិ៍ បានដាក់ប៉ុស្តិ៍ត្រួតពិនិត្យជាច្រើនកន្លែង តាមច្រកចេញចូលរបស់អ្នកភូមិ នៅឃុំសុនឡយ ដោយមានពាក់ម៉ាស់មុខ និងសម្លៀកបំពាក់ការពារ ឧបករណ៍ស្ទង់កំដៅ រួមនិងបាញ់ថ្នាំសម្លាប់មេរោគ ផងដែរ ។
អ្នកភូមិត្រឹនវ៉ាន់មិញ បានប្រាប់ AFP ថា អាជ្ញាធរបានណែនាំអ្នកភូមិ អោយចៀសវាងកន្លែងមានមនុស្សច្រើនកុំប្រមូលផ្តុំគ្នា ។ លោកប្រាប់បន្តតាមទូរស័ព្ទថា “ជីវភាពគ្រួសាររបស់លោក បានរងផលប៉ះពាល់ ដោយសារពឹងផ្អែកលើលោកជាកម្មករសំណង់ ។ ឥឡូវនេះ យើងមិនអាចចេញទៅក្រៅបានទេ ហើយទោះបីយើង ចេញទៅក្រៅបាន ក៏អតិថិជនមិនស្វាគមន៍ពួកយើងដូចមុនដែរ” ។
សូមបញ្ជាក់ថា វៀតណាមជាប្រទេសដំបូងគេបង្អោះ ដែលមានករណីឆ្លងវីរុស COVID-19 ពីប្រទេសចិន ដែលមានព្រំដែនជាប់គ្នា គិតមកត្រឹមថ្ងៃទី១៣ កុម្ភៈនេះ ប្រទេសវៀតណាម មានការឆ្លងវីរុសនេះ ដល់ ១៦ករណីហើយ រួមទាំងអ្នកភូមិ ក្នុងឃុំសុនឡយផងដែរ ៕