វ៉ាស៊ីនតោន ៖ លោកប្រធានាធិបតីអាមេរិក ដូណាល់ ត្រាំ បានព្យាករណ៍ទុកមុនថា ការរីករាលដាល នៃវីរុសកូរ៉ូណា ដែលបានសម្លាប់មនុស្សគិតត្រឹមថ្ងៃទី១១ កុម្ភៈនេះ អស់ជាង១,០០០នាក់ និងអ្នកឆ្លងជាង៤២,២០០នាក់ហើយនោះ ទំនងជានឹងបាត់ទៅវិញ នៅខែមេសា ដោយសារកម្ដៅ នេះបើតាមវេបសាយ sputniknews ។
លោកប្រធានាធិបតី Trump បានព្យាករណ៍កាលថ្ងៃទី១០ ខែកុម្ភៈថា វីរុសកូរ៉ូណាថ្មី នឹងមិនអាចទប់ទល់នឹងកម្តៅ ពេលដែលចូលដល់និទាឃរដូវ “រដូវក្ដៅ” នោះបានទេ ។
លោក ដូណាល់ ត្រាំ បានថ្លែងពីសេតវិមានថា “ត្រឹមខែមេសា ឬក្នុងអំឡុងខែមេសា នោះកម្ដៅជាទូទៅវាអាចសម្លាប់មេរោគប្រភេទនេះបាន” វាជារឿងល្អ ។
លើសពីនេះលោកត្រាំ ប្រមុខសេតវិមានបានលើកសរសើរជាថ្មីម្តងទៀត ចំពោះការខិតខំប្រឹងប្រែងរបស់ទីក្រុងប៉េកាំង ក្នុងការទប់ស្កាត់ការឆ្លងរីករាលដាលនៃវីរុសនេះ ។
លោកត្រាំ មានប្រសាសន៍យ៉ាងដូច្នេះថា “ខ្ញុំគិតថា ពួកគេ(ចិន)កំពុងធ្វើបានល្អ” ។ “ខ្ញុំពិភាក្សាគ្នាជាយូរមកហើយជាមួយប្រធានាធិបតីចិនលោក ស៊ី ជីនពីង គាត់មានជំនឿចិត្តខ្ពស់” ៕
