ប៉េតាំង ៖ អង្គការសុខភាពពិភពលោក ប្រើពេលជិតពីរសប្តាហ៍ ទម្រាំទទួលបានការអនុញ្ញាតិពីអាជ្ញាធរចិន បង្កើតក្រុមអ្នកជំនាញរួមគ្នា អាចចេញទៅបំពេញបេសកកម្មចូលទៅធ្វើការស៊ើបអង្កេតកូរ៉ូណាវីរុស នៅផ្ទាល់កន្លែង ដែលដឹកនាំដោយលោក Bruce Aylward ជនជាតិកាណាដា ដែលមានជំនាញផ្នែករោគរាតត្បាត ធ្លាប់ល្បីឈ្មោះខ្លាំងក្នុងការដឹកនាំបេសកកម្មប្រយុទ្ធប្រឆាំងនឹងជំងឺអេបូឡា នៅអាហ្វ្រិក ។
ក្រុមអ្នកជំនាញបានទៅដល់ក្រុងវូហាន នៅថ្ងៃចន្ទទី ១០កុម្ភៈនេះ នឹងផ្តល់ជាយោបល់ស្តីពីការការពារ និងត្រួតពិនិត្យរួមគ្នា នៃការឆ្លងវីរុសនេះ ចំពោះប្រទេសចិន និងជំហានបន្ទាប់ ប្រទេសដែលរងផលប៉ះពាល់ដទៃទៀត ។
អ្នកនាំពាក្យក្រសួងសុខាភិបាលជាតិចិន លោក Mi Feng បាននិយាយថា ប្រទេសចិន និងអង្គការសុខភាពពិភពលោក (WHO) នឹងបង្កើតក្រុមអ្នកជំនាញរួមគ្នា ដើម្បីធ្វើការពិភាក្សាស៊ីជម្រៅ និងវាយតម្លៃលើការឆ្លងរាលដាលនៃវីរុសថ្មី បង្កឡើងដោយវីរុសកូរ៉ូណានេះ ។
លោក Mi Feng បានថ្លែងនៅក្នុងសន្និសីទសារព័ត៌មានមួយ នៅទីក្រុងប៉េកាំង អោយដឹងថា យើងស្វាគមន៍អ្នកជំនាញអន្តរជាតិ រួមទាំងអ្នកមកពីសហរដ្ឋអាមេរិក អនុញ្ញាតិឲ្យចូលរួមក្នុងក្រុមអ្នកជំនាញរួមគ្នានេះ ។
លោកបានបន្ថែមថា ការរៀបចំសមស្របសម្រាប់ក្រុមនេះ នឹងត្រូវធ្វើឡើង បន្ទាប់ពីមានការពិគ្រោះយោបល់និងការប្រាស្រ័យទាក់ទងយ៉ាងហ្មត់ចត់ ។
គួរជម្រាបថា ក្រុមអ្នកជំនាញអន្តរជាតិ+ចិន សម្រាប់បេសកកម្មនៅវូហាននេះ ត្រូវស្រាវជ្រាវអង្កេតអំពីមេរោគកូរ៉ូណាប្រភេទថ្មីនេះ មានប្រភពចម្លងដំបូងចេញមកពីណា ? ក្រុមអ្នកជំនាញអង្គការសហប្រជាជាតិ ក៏នឹងត្រូវសិក្សាវាយតម្លៃ ថាតើវិធានការរបស់រដ្ឋាភិបាលចិន ពិសេសចំណាត់ការបិទទីក្រុង ដើម្បីទប់ស្កាត់ការរាតត្បាត មានផលប៉ះពាល់ និងប្រសិទ្ធភាពយ៉ាងណា ? ព្រោះថា ក្នុងរយៈពេលបួនថ្ងៃជាប់គ្នាចុងក្រោយនេះ ចំនួនអ្នកឆ្លងថ្មី កើនឡើងក្នុងបរិមាណថេរ ។ ដូច្នេះវាជាដំណឹងល្អ បញ្ជាក់អំពីប្រសិទ្ធភាព នៃចំណាត់ការរបស់រដ្ឋាភិបាលចិន ។ ស្របគ្នាទៅនឹងរយៈពេលសំងំរបស់វីរុសថ្មី និងបើវិធានការបំបែកអ្នកមានផ្ទុកមេរោគ ដោយឡែកពីគេ មានប្រសិទ្ធភាពមែន នោះគេនឹងអាចសង្ឃឹមបានថា ការរីករាលដាល នៃមេរោគកូរ៉ូណាថ្មីនឹងចាប់ថយចុះនៅចុងខែ ។ ផ្ទុយទៅវិញ ប្រសិនបើវិធានការពុំមានប្រសិទ្ធភាពទេ នោះការរាលដាលនឹងស្ទុះឡើងវិញ ៕
