ភ្នំពេញ ៖ លោក លី សូវ៉ាន់ អ្នកនាំពាក្យក្រសួងសុខាភិបាល សូមប្រកាសច្រានចោលនូវការផ្សព្វផ្សាយតាមបណ្តាញសង្គមថា ការដួលសន្លប់របស់ជនបរទេសម្នាកនេះ មិនមែនបណ្តាលមកពីជំងឺរលាកផ្លូវដង្ហើមថ្មីកូរ៉ូណា នោះទេ ។
អ្នកនាំពាក្យក្រសួងសុខាភិបាល បានថ្លែងប្រាប់សារព័ត៌មានក្នុងស្រុកអោយដឹងថា ក្រោយពេលក្រុមគ្រូពេទ្យពិនិត្យជនរងគ្រោះ រួចមក ឃើញថា បុរសជនបរទេសរូបនេះ មិនមានការពាក់ព័ន្ធនឹងជំងឺកូរ៉ូណាទេ ដោយកម្តៅខ្លួនរបស់គាត់ធម្មតា ។ ការដួលសន្លប់របស់គាត់នេះ អាចបណ្តាលមកពីខ្យល់គរ តែប៉ុណ្ណោះ ។ យ៉ាងណា បុរសដែលដួលសន្លប់នោះ គឺជនជាតិឥណ្ឌាកាត់អង់គ្លេសត្រូវបានសមត្ថកិច្ចប្រចាំនៅព្រលានយន្តហោះដឹកទៅសង្គ្រោះបន្ទាន់នៅមន្ទីរពេទ្យរ៉ូយាល់រតនៈ បន្ទាប់ពីឃើញដួលសន្លប់ ។
សូមជម្រាបថា នៅវេលាម៉ោងប្រមាណ៩និង៣០នាទីព្រឹកថ្ងៃទី៩ កុម្ភៈនេះ មានការភ្ញាក់ផ្អើលមួយ ដោយមានជនបរទេសម្នាក់ បានដួលសន្លប់ នៅព្រលានយន្តហោះអន្តរជាតិភ្នំពេញ ជាហេតុធ្វើឱ្យសាធារណជននៅក្បែរនោះ ថតបង្ហោះលើបណ្តាញសង្គម ដោយបំភ្លៃថាជាជំងឺកូរ៉ូណា ៕