អង់គ្លេស ៖ យោងតាមសារព័ត៌មានបរទេសបានចុះផ្សាយកាលពីថ្អៃទី៤ កុម្ភៈ ២០២០នេះថា នាយករដ្ឋមន្ដ្រីអង់គ្លេសលោក បូរីស ចនសុន Boris Johnson បានប្រកាសថា អង់គ្លេស នឹងហាមឃាត់ការលក់រថយន្ត ប្រភេទម៉ាស៊ីនសាំង និងប្រភេទម៉ាស៊ីនប្រេងម៉ាស៊ូតថ្មី ចាប់ពីឆ្នាំ២០៣៥ តទៅ និងសន្យាកាត់បន្ថយការបំភាយឧស្ម័នផ្ទះកញ្ចក់ដល់កម្រិតសូន្យ ត្រឹមឆ្នាំ២០៥០ ។
ការប្រកាសរបស់លោក បូរីស ចនសុន ដែលបានធ្វើឡើងនៅក្នុងព្រឹត្តិការណ៍ ស្តីពីការប្រែប្រួលអាកាសធាតុ COP26 ដែលអង់គ្លេសធ្វើជាម្ចាស់ផ្ទះនេះ បានកាត់បន្ថយចំនួន០៥ឆ្នាំ ពីកាលបរិច្ឆេទដើម ដែលថា នឹងហាមឃាត់ការលក់រថយន្តទាំងនេះ ចាប់ពីឆ្នាំ២០៤០ តទៅ ហើយផែនការថ្មីនេះត្រូវបានរួមបញ្ចូលទាំងរថយន្តកូនកាត់ផងដែរ ។
នាយករដ្ឋមន្ត្រីអង់គ្លេសរូបនេះ បានថ្លែងថា ការរៀបចំ COP26 គឺជាឱកាសដ៏សំខាន់មួយ សម្រាប់អង់គ្លេស និងប្រទេសជាច្រើនទូទាំងពិភពលោក ដើម្បីបង្កើនល្បឿន ក្នុងការប្រយុទ្ធប្រឆាំងការប្រែប្រួលអាកាសធាតុ ។
លោកបញ្ជាក់ថា ឆ្នាំ២០២០ ត្រូវតែជាឆ្នាំ ដែលយើងផ្លាស់ប្តូរចំពោះការឡើងកម្ដៅលើពិភពលោក វានឹងជាឆ្នាំដែលយើងជ្រើសរើសអនាគតកាន់តែស្អាត កាន់តែបៃតង សម្រាប់ទាំងអស់គ្នា ។
ជាមួយគ្នានេះ លោក ចនសុន ក៏នឹងជំរុញឲ្យប្រទេសផ្សេងទៀត ចូលរួមជាមួយអង់គ្លេស ក្នុងការព្យាយាមឆ្ពោះទៅទិសដៅ ការកាត់បន្ថយការបំភាយឧស្ម័ន មកត្រឹមសូន្យ ឲ្យបាននៅឆ្នាំ២០៥០ តាមរយៈការវិនិយោគលើបច្ចេកវិទ្យាកាន់តែស្អាត និងកិច្ចប្រឹងប្រែងការពារជម្រកធម្មជាតិ ។
គួរបញ្ជាក់ផងដែរថា អង់គ្លេសបានសន្យាថា នឹងកាត់បន្ថយការបំភាយឧស្ម័នផ្ទះកញ្ចក់ ឲ្យដល់កម្រិតសូន្យត្រឹមឆ្នាំ២០៥០ ជាមួយនឹងវិធានការចម្រុះ នៃការកាត់បន្ថយ និងការប៉ះប៉ូវ ការបំពុលខ្យល់ដូចជាការដាំដើមឈើជាដើម ៕