ខេត្តព្រះសីហនុ ៖
មានការភ្ញាក់ផ្អើលមួយ កើតឡើងដោយសារតែក្មេងស្រីម្នាក់ ស្រែកជួយខ្ញុំផងៗ… បានរត់ចេញពីសណ្ឋាគារសណ្ឋាគារ និងកាស៊ីណូ (ហាវឆឹង ហៅរលកធំ) របស់ជនជាតិចិន ស្រែកផង! យំផង! ប៉ុន្តែចុះដល់ខាងមុខអាគារ ត្រូវបានសន្តិសុខធ្វើការចាប់ជាប់ ។
ហេតុការណ៍នេះ កើតឡើងនៅវេលាម៉ោង១០និង៣០នាទីព្រឹក ថ្ងៃទី២៤ ខែមករា ឆ្នាំ២០២០ នៅសណ្ឋាគារ និងកាស៊ីណូហាវឆឹង មានទីតាំងនៅខាងមុខកាហ្វេស្តារ ផាកតាមបណ្ដោយវិថី៧មករា ស្ថិតក្នុងភូមិលេខ៣ សង្កាត់៤ ក្រុងព្រះសីហនុ ។
ក្រោយកើតហេតុ ភ្លាមៗ កម្លាំងសមត្ថកិច្ចកងរាជអាវុធហត្ថ ខេត្តព្រះសីហនុ ក៏បានចុះដល់ចំណុចកើតហេតុផងដែរ ។ ដំបូងឡើយក្រុមអ្នកសារព័ត៌មាន មិនត្រូវបានមេការសណ្ឋាគារ និងកាស៊ីណូ ដែលជាជនជាតិចិនអនុញ្ញាតឲ្យចូលយកព័ត៌មាន ឬថតរូបនោះឡើយ តែក្រោយមក ដោយមានការសម្របសម្រួលពីសមត្ថកិច្ច ទើបអ្នកសារព័ត៌មានអាចចូលថត និងយកព័ត៌មានបាន ។
ក្រោយពេល ឆែកឆេរបន្ទប់លេខ៨៦០៥ជាន់ទី៦ ដែលជាបន្ទប់របស់ ស្ត្រីវ័យក្មេងខាងលើស្នាក់នៅ ឃើញមានសុទ្ធថ្នាំញៀននៅរាយប៉ាយពេញលើគ្រែពូក និងឈានដល់ការចាប់ខ្លួនមនុស្សប្រុសស្រីចំនួន៣នាក់ ផ្សេងទៀត ក្នុងនោះមានបុរសជនជាតិចិនម្នាក់ផងដែរ សមត្ថកិច្ចបានធ្វើការដកហូតវត្ថុតាងបទល្មើសជាក់ស្ដែង រួមមាន ៖ ម្សៅសថ្លា ចំនួន២កញ្ចប់, ថ្នាំខេចំនួន២កញ្ចប់, ថ្នាំពណ៌បៃតង ចំនួន៦, កញ្ឆាមូលជាបារីចំនួន៤ដើម, ដែកកេះចំនួន៥ និងទូរស័ព្ទចំនួន០១គ្រឿង ។
បើតាមចម្លើយរបស់ក្មេងស្រី ជាជនជាតិខ្មែរ ប្រាប់ថា ពួកនាងមិនមែនជាអ្នកជួញដូរគ្រឿងញៀននេះទេ គ្រាន់តែធ្លាប់តែប្រើប៉ុណ្ណោះ ហើយគ្រឿងញៀននេះ ជារបស់ជនជាតិចិនឈ្មោះ ណាន ខៃ ដោយពួកនាងមិនថា គ្រឿងញៀនច្រើនរបស់ជនជាតិចិននោះ យកមកពីទីណាទេ ដោយពួកនាងត្រូវបានជនជាតិចិននោះ នាំមកស្នាក់នៅក្នុងសណ្ឋាគារនេះ នៅព្រឹកថ្ងៃទី២៤នេះ ប៉ុណ្ណោះ ។
ចំណែកក្មេងស្រីម្នាក់ទៀត ដែលសង្ស័យថា ប្រើគ្រឿងញៀនលើសកម្រិតរហូតដល់មានកាយវិការប្លែកៗចុះរត់ផ្អើលគេឯងនោះ ពួកនាងថា បានយកគ្រឿងញៀនលាយជាមួយ ភេសជ្ជៈ គោជល់ ហើយផឹក ទើបមានអាការៈ ដូច្នេះតែម្ដង ។
បច្ចុប្បន្ន ជនជាប់សង្ស័យទាំង៤នាក់ខាងលើ ត្រូវបានសមត្ថកិច្ចកងរាជអាវុធហត្ថខេត្តព្រះសីហនុ ធ្វើការសាក សួរដើម្បីកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់ការតាមផ្លូវច្បាប់ ៕
