រាជធានីភ្នំពេញ ៖ ជ្រូកខ្វៃ នៅតែជាតម្រូវការខ្ពស់ ក្នុងថ្ងៃសែនចូលឆ្នាំថ្មីប្រពៃណីចិន អ្នករស់នៅក្នុងរាជធានីភ្នំពេញ ជាប់សែស្រឡាយចិន មិនរុញរាទិញជ្រូកខ្វៃសម្រាប់យកទៅសែនព្រេនជូនជីដូនជីតាកុងម៉ា ដែលចែកឋានទៅបរលោកខាងមុខនោះដែរ ទោះបីអ្នកលក់តម្លើងថ្លៃកប់ពពកក៏ដោយ ។
បើតាមម្ចាស់ហាងលក់ជ្រូកខ្វៃ ឈ្មោះថា«តាម៉ាប់៧មករា» នៅខណ្ឌទួលគោក បានប្រាប់ឲ្យដឹងថា ជ្រូកខ្វៃឆ្នាំនេះ មានតម្លៃឡើងថ្លៃកប់ពពក ដោយសារតែជ្រូកមិនសូវសំបូរ ។
ម្ចាស់ហាងជ្រូកខ្វៃ៧មករា មានប្រសាសន៍បន្តថា ឆ្នាំមុន ក្នុងរដូវចូលឆ្នាំចិន កន្លែងរបស់លោក លក់ជ្រូកអស់ប្រមាណ៤០០ ទៅ៥០០ក្បាលឯណោះ ។ ដោយឡែកឆ្នាំនេះ មានជ្រូកខ្វៃតែជាង២០០ក្បាលប៉ុណ្ណោះ ហើយលោក សម្រេចបិទការកុម៉ង់ទិញ ដោយហេតុថា មិនមានជ្រូកសម្រាប់លក់ជូនអតិថិជននោះទេ ។ការដែលមិនមានជ្រូកលក់ក៏ព្រោះតែកាលពីប៉ុន្មានខែមុននេះ មានការផ្ទុះឡើងជម្ងឺប៉េស្ដជ្រូកអាហ្វ្រិក ទើបធ្វើឲ្យជ្រូកក្នុងស្រុកបានស្លាប់ជាច្រើនក្បាល ដែលបណ្ដាលខ្វះជ្រូកជាខ្លាំង ទើបតម្លៃលក់ជ្រូកខ្វៃក្នុងអំឡុងចូលឆ្នាំចិននេះ ឡើងកប់ពពកដូច្នេះ ។
សូមរម្លឹកថា ក្នុងថ្ងៃសែនប្រពៃណីចិនកាលពីឆ្នាំមុន ជ្រូកខ្វៃ១ក្បាល មានតម្លៃរង្វង់២០០ទៅ៣៥០ដុល្លារអាមេរិក ខណៈថ្ងៃធម្មតាត្រឹមតែ៣៥ម៉ឺនរៀលប៉ុណ្ណោះ ៕