រាជធានីភ្នំពេញ ៖ ក្រោយពីមានព័ត៌មានបំពុលសង្គមតាមបណ្ដាញសង្គមហ្វេសប៊ុក ដែលបន្តផ្សាយដោយគេហទំព័រមួយចំនួនបង្កការភ្ញាក់ផ្អើលថា ជំងឺរលាកសួតប្រភេទថ្មី បានចូលមកប្រទេសកម្ពុជា តាមច្រកព្រលានយន្ដហោះអន្ដរជាតិខេត្តព្រះសីហនុនោះ នៅរសៀលថ្ងៃទី២៣ ខែមករា ឆ្នាំ២០២០នេះ រដ្ឋបាលខេត្តព្រះសីហនុ បានច្រានចោលនូវព័ត៌មានបំពុលសង្គមមួយនេះ និងបានអះអាងថា រហូតមកដល់ពេលនេះ គ្មានឡើយវត្ដមានជំងឺរលាកសួតប្រភេទថ្មី ឆ្លងពីប្រទេសចិនមកកម្ពុជាទេ ។
ដោយរដ្ឋបាលខេត្តបានសរសេររៀបរាប់ថា “គិតត្រឹមម៉ោងនេះ នៅក្នុងទឹកដី នៃខេត្តព្រះសីហនុទាំងមូល មិនមានករណីជម្ងឺរលាកសួតប្រភេទថ្មី (កូរ៉ូណា) នេះឡើយ ។ រាល់ការផ្សព្វផ្សាយព័ត៌មានដែលគ្មានមូលដ្ឋាន នៃការពិត គឺជាការបំពុលសង្គម និងធ្វើឱ្យមានការជ្រួលច្របល់ ។ សូមរង់ចាំតាមដានសេចក្តីប្រកាសព័ត៌មានរបស់ក្រសួងសុខាភិបាល ដែលធ្វើការបញ្ជាក់បន្ថែមលើករណីនេះ” ។
សូមបញ្ជាក់ថា រាល់ព័ត៌មានផ្លូវការនឹងត្រូវប្រកាសដោយអង្គភាពអ្នកនាំពាក្យរាជរដ្ឋាភិបាល និងក្រសួងសុខាភិបាល ៕
