ភ្នំពេញ៖ ថ្មីៗនេះពលរដ្ឋជាច្រើនដែលរស់នៅជាប់ផ្លូវជាតិលេខ៣ ក្នុងខេត្តកំពត និងខេត្តតាកែវ បារម្ភថា កុមារមួយចំនួនកើតជំងឺ រលាកសួត និងផ្លូវដង្ហើម ដោយសារតែធូលីដីហុយខ្លាំងអស់រយៈពេលជាង ២ឆ្នាំមកហើយ។ ម្យ៉ាងវិញទៀត ពួកគាត់ថា បញ្ហាធូលីហុយនេះបានបង្កជាគុណវិបត្តិធ្ងន់ធ្ងរ ដូចជាហានិភ័យ គ្រោះថ្នាក់ចរាចរណ៍ ប្រឡាក់សំលៀកបំពាក់ និងប៉ះពាល់ដល់សុខភាពជាដើម។
ពលរដ្ឋមួយចំនួនបានធ្វើការ អំពាវនាវឱ្យរដ្ឋាភិបាល និងស្ថាប័នពាក់ព័ន្ធពន្លឿនការកសាងផ្លូវជាតិលេខ ៣ និងស្រោចទឹកផ្លូវនេះជាប្រចាំ ដើម្បីកាត់បន្ថយធូលីដីហុយខ្លាំង ប៉ះពាល់ដល់សុខភាពពលរដ្ឋ អ្នកដំណើរ និងជាពិសេសកុមារ។
បើតាមស្ដីរបស់ពលរដ្ឋម្នាក់រស់នៅស្រុកត្រាំកក់ ខេត្តតាកែវ លោក ស៊ឺន ពិសិទ្ធិ បានប្រាប់ឲ្យដឹងថា ផ្លូវជាតិលេខ៣ ចាប់ចំណុចកំពង់ទួល នៃស្រុកកណ្ដាលស្ទឹង ខេត្តកណ្តាល ដល់ស្រុកត្រាំកក់ខេត្តតាកែវ មានប្រវែងប្រមាណ ៥០គីឡូម៉ែត្រ មានភាពលំបាកយាប់យ៉ឺនខ្លាំង និងហុយធូលីដី។ លោកថា ពលរដ្ឋរស់នៅអមសងខាងផ្លូវជាតិនេះ តែងត្អូញត្អែរពីផលប៉ះពាល់សុខភាព និងលំបាកធ្វើដំណើរជាង ២ឆ្នាំមកហើយ៖ «ការធ្វើផ្លូវវិនិយោគរបស់ចិន ឃើញថា វាធ្វើយឺតយ៉ាវ អត់មានបច្ចេកទេសត្រឹមត្រូវ។ អ្នកនៅជុំវិញហ្នឹងប៉ះពាល់សុខភាពទី១ សួត និងខ្យល់ដង្ហើមរបស់គាត់ ហើយវាប៉ះពាល់សុខភាព ពលរដ្ឋរស់នៅភូមិហ្នឹង ដែលរស់នៅតាមដងផ្លូវហ្នឹងប៉ះពាល់សុខភាពគាត់មែនទែន។ វាហុយចូលចំណីអាហារគាត់ គាត់ធ្វើដំណើរ និងជំងឺផ្លូវដង្ហើម»។
ចំណែក ពលរដ្ឋម្នាក់ទៀត រស់នៅជាប់ផ្លូវជាតិលេខ ៣ ក្នុងស្រុកទឹកឈូ ខេត្តកំពត បានឱ្យដឹងថា កូនៗរបស់លោកស្រី ២នាក់ មានអាយុ ៧ឆ្នាំ និង ៩ឆ្នាំ មានជំងឺរលាកសួត និងផ្លូវដង្ហើម ដោយសារស្រូបយកធូលីដី នៅពេលដែលពួកគេធ្វើដំណើរទៅសាលារៀនដោយជិះកង់។ លោកស្រីថា មិនត្រឹមតែគ្រួសារលោកស្រីទេ កើតជំងឺនេះ មានកុមារជាច្រើននាក់ទៀត ក៏មានជំងឺដូចគ្នានេះដែរ៖ «កូនខ្ញុំពីរនាក់ ហើយក្មេងៗពីរ បីនាក់ទៀត នៅក្បែរគ្នាហ្នឹង ដូចគ្នាឈឺដូចគ្នាហ្នឹង ក្អកហត់ មានបញ្ហាសួតរហូតផ្លូវដង្ហើម។ គាត់ក្អកហើយរលាកសួត ហើយភ្នែកឡើងក្រហមអស់ហើយពូអើយ ដីហុយ។ ពិបាកធ្វើដំណើរហុយខ្លាំងពេកមើលមនុស្សអត់ឃើញហ្មង»។
ក្រុមពលរដ្ឋដែលរស់នៅតាមដងផ្លូវជាតិលេខ៣ ត្អូញថា ធូលីដីហុយខ្លាំង នៅតាមផ្លូវជាតិលេខ៣ រាប់សិបគីឡូម៉ែត្រ ដែលងាយនឹងកើតមានគ្រោះថ្នាក់ចរាចរណ៍ ប៉ះពាល់ខ្លាំងជាងគេ គឺអ្នកធ្វើដំណើរតាមម៉ូតូ និងកង់ ជាពិសេសសិស្សានុសិស្សដែលធ្វើដំណើរទៅសាលារៀន ៕