បរទេស៖ នាព្រឹកថ្ងៃពុធ ទី២២ ខែមករា ឆ្នាំ២០២០ អាជ្ញាធរថៃបានបង្គាប់ឲ្យសាលារៀន ៤៣៧កន្លែង នៅទូទាំងរាជធានីបាងកកបិទទ្វារជាបណ្តោះអាសន្នសិន ព្រោះតែផ្សែងពុលនៅក្នុងទីក្រុងមួយ កំពុងតែកើនឡើងខ្លាំងនៅក្នុងកម្រិតគ្រោះថ្នាក់ ខណៈស្ថានភាពនឹងធូរស្រាលនៅពេលណានោះ គឺមិនទាន់មានការបញ្ជាក់នោះឡើយ។ នេះបើតាមការចេញផ្សាយដោយ CNA។
អាជ្ញាធរតាមដានគុណភាពខ្យល់របស់ទីក្រុងបាងកកបានឲ្យដឹងថាកម្រិតខ្យល់ពុល (AQI) បានកើនឡើងដល់ ១៧០ ខណៈកម្រិតចាប់ពី ១៥០ឡើងទៅនោះ គឺត្រូវបានចាត់ទុកថា ប៉ះពាល់ដល់សុខភាពទៅហើយ។ វាមិនមែនជារឿងចម្លែកឡើយសម្រាប់ទីក្រុងបាងកក ព្រោះជាទីក្រុងដែលមានអគារខ្ពស់ៗ និងចរាចរណ៍យានជំនិះយ៉ាងកកស្ទះរាល់ថ្ងៃ ប៉ុន្តែទោះបីជាមានការព្យាយាមដោះស្រាយបញ្ហា តាមគ្រប់រូបភាពជាច្រើនឆ្នាំមកនេះក៏ដោយ ស្ថានភាពបំពុលខ្យល់ហាក់ដូចជាមិនមានការប្រែប្រួលឡើយ ៕