សហរដ្ឋអាមេរិក ៖ ជាលើកដំបូងហើយ ដែលអាមេរិក បានប្រកាសកាលពីថ្ងៃអង្គារ ទី២១ មករា ២០២០ អំពីការរកឃើញករណីដំបូង នៃការឆ្លងវីរុសផ្លូវដង្ហើមដ៏កាចសាហាវ ដែលកំពុងវាយប្រហារប្រទេសចិន និងផ្តាច់ជីវិតមនុស្ស ០៦នាក់មកហើយ ។
បុរសម្នាក់ ដែលជាពលរដ្ឋអាមេរិក អាយុខ្ទង់៣០ឆ្នាំ រស់នៅក្បែរទីក្រុងសៀតថល (Seattle) នៃរដ្ឋវ៉ាស៊ីនតោនស្ទេត (Washington State) ភាគខាងលិចសហរដ្ឋអាមេរិក បានទៅរកគ្រូពេទ្យដោយខ្លួនឯង បន្ទាប់ពីលោកមានអការៈ សង្ស័យជំងឺផ្លូវដង្ហើមថ្មី ដោយបុរសរូបនេះបានចូលអាមេរិកកាលពីថ្ងៃ ១៥ មករា ក្រោយបានធ្វើដំណើរទៅក្រុងវូហាន នៅ២ថ្ងៃមុន ។ ក្រោយការពិនិត្យ មន្ទីរពេទ្យក្នុងតំបន់ បានអះអាងថា បុរសរូបនេះពិតជាមានផ្ទុកវីរុសខូរ៉ូណា (Coronavirus) ដែលជាវីរុសផ្លូវដង្ហើមធ្ងន់ធ្ងរមានប្រភពដើមពីចិននោះប្រាកដមែន ។
ជុំវិញករណីឆ្លងដល់សហរដ្ឋអាមេរិកនេះ មន្ត្រីសុខាភិបាលប្រចាំរដ្ឋវ៉ាស៊ីនតោន លោក Chris Spitter បានលើកឡើងថា បច្ចុប្បន្នអ្នកជំងឺកំពុងសម្រាកព្យាបាលនៅមន្ទីរពេទ្យ នៅក្នុងលក្ខណៈជាការប្រុងប្រយ័ត្នខ្ពស់ ពោលគឺបុរសនេះកំពុងព្យាបាលដាច់ដោយឡែកពីគេ ហើយយើងនឹងធ្វើការត្រួតពិនិត្យដោយយកចិត្តទុកដាក់បំផុត ព្រោះអការអ្នកជំងឺមិនទាន់ធ្ងន់ធ្ងរនោះទេ ។
លោក Chris Spitter បន្តថា នេះគឺជាស្ថានការណ៍ដែលកំពុងតែវិវត្តឡើង ហើយជាថ្មីម្តងទៀតយើងរំពឹងថា នឹងអាចមានអ្នកជំងឺបន្ថែមនៅសហរដ្ឋអាមេរិក និងនៅទូទាំងពិភពលោក ។ ទោះជាបែបនេះក្តី ហានិភ័យសម្រាប់ពលរដ្ឋអាមេរិក នៅតែស្ថិតក្នុងកម្រិតទាបនៅឡើយ ។ អាជ្ញាធរអាមេរិក បានដាក់ឧបករណ៍វាស់កំដៅខ្លួន អ្នកទេសចរណ៍ចិន នៅតាមអាកាសយានដ្ឋានធំៗ ផងដែរ ។
ដោយឡែក កាលពីថ្ងៃទី២១ មករា ២០២០ តៃវ៉ាន់ ក៏បានរាយការណ៍ថា រកឃើញករណីដំបូង នៃអ្នកឆ្លងកូរ៉ូណាវីរុសនេះ ។ អ្នកជំងឺជាស្ត្រី តៃវ៉ាន់ វ័យខ្ទង់៥០ឆ្នាំ ដែលរស់នៅក្រុងវូហាន ហើយបានវិលមកកោះតៃវ៉ាន់កាលពីថ្ងៃចន្ទ ជាមួយនឹងរោគសញ្ញាក្តៅខ្លួន ក្អក និងឈឺបំពង់ក ធ្ងន់ធ្ងរ ។
សូមបញ្ជាក់ផងដែរថា គិតត្រឹមថ្ងៃទី២២ មករា ២០២០នេះ មនុស្សស្លាប់ដោយសារវីរុសផ្លូវដង្ហើម ខូរ៉ូណា មានចំនួន០៦នាក់ហើយ និងជាង៣០០នាក់ទៀត បានឆ្លងវីរុសនេះ ។ ហើយទីក្រុងដែលបានរកឃើញវត្តមាន នៃជំងឺនេះ មានទីក្រុងវូហាន, ប៉េកាំង, សៀងហៃ និងខេត្តក្វាងទុង ។ ចំណែកឯ ប្រទេសមួយចំនួន ដែលបានរកឃើញវត្តមានអ្នកមានផ្ទុកវីរុសនេះដែរ គឺមានដូចជា ថៃ កូរ៉េខាងត្បូង ជប៉ុន តៃវ៉ាន់ និងសហរដ្ឋអាមេរិក ៕
កម្ពុជាបំពាក់ម៉ាស៊ីនទំនើប ស្ទង់រកវីរុសផ្លូវដង្ហើមថ្មី តាមច្រកទ្វារអន្តរជាតិសំខាន់ៗ