រាជធានីភ្នំពេញ ៖ លោក លី សុវ៉ាន់ អ្នកនាំពាក្យក្រសួងសុខាភិបាល បានអោយដឹងថា កម្ពុជាបានដាក់គ្រូពេទ្យជំនាញ និងម៉ាស៊ីនស្ទង់កំដៅ(ស្កេន) ដើម្បីរកវីរុសផ្លូវដង្ហើមថ្មី នៅព្រលានយន្តហោះអន្តរជាតិភ្នំពេញ, សៀមរាប និងក្រុងព្រះសីហនុ ចំណែកផ្លូវគោកវិញ នៅច្រកប៉ោយប៉ែត, ច្រកបាវិត និងច្រកព្រែចាក ខេត្តកំពត ។
អ្នកនាំពាក្យក្រសួងសុខាភិបាល លោកបន្តថា មន្ត្រីសុខាភិបាលកម្ពុជាចំនួន ២,០០០រូប ត្រូវបានបណ្តុះបណ្តាល និងមានការរៀបចំ មន្ទីរពិសោធន៍រួចរាល់ហើយដែរ នៅគ្រាដែលអាជ្ញាធរចិនអះអាងថា វីរុសផ្លូវដង្ហើមថ្មី អាចឆ្លងពីមនុស្សទៅមនុស្ស ខណៈអង្គការសុខភាពពិភពលោក (WHO) ប្រកាសរៀបចំកិច្ចប្រជុំ បន្ទាន់មួយ នៅក្នុងសប្តាហ៍នេះ ។
លោក លី សុវ៉ាន់ ក៏បានបញ្ជាក់ដែរថា រហូតមកដល់ថ្ងៃទី២១ មករា ២០២០នេះ កម្ពុជាអត់មានករណីសង្ស័យលើអ្នកដំណើរណាម្នាក់បានឆ្លងវីរុសផ្លូវដង្ហើមថ្មីនោះទេ ។ ហើយរោគសញ្ញា ដែលសង្ស័យថាជា វីរុសខូរ៉ូណា (Coronavirus)នេះ រួមមាន គ្រុនក្តៅ ឬប្រវត្តិគ្រុនក្តៅ ក្អក ករណីធ្ងន់ធ្ងរមានហត់ ឬពិបាកដកដង្ហើម ។
យ៉ាងណា មន្ត្រីក្រសួងសុខាភិបាល ក៏បានអំពាវនាវសូមអោយពលរដ្ឋមានការប្រុងប្រយ័ត្ន កុំប៉ះសត្វស្លាប នៅរស់ដោយផ្ទាល់ កុំបរិភោគស៊ុត និងសាច់ឆៅ ។ ប្រសិនបើពលរដ្ឋមានចម្ងល់ ឬមានអាការៈប្លែក ឆាប់រាយការណ៍ ឫទំនាក់ទំនងមកលេខ ១១៥ ជាបន្ទាន់ ។
សូមជម្រាបផងដែរថា ក្រសួងសុខាភិបាលចិន កាលពីថ្ងៃទទី២០ មករា បានប្រកាសថា បុគ្គលិកពេទ្យបានឆ្លងកូរ៉ូណាវីរុស ដែលគេរកឃើញលើកដំបូងនៅទីក្រុងវូហាន ដែលការប្រកាសនេះ បញ្ជាក់ថា វីរុសអាថ៌កំបាំងនេះ អាចចម្លងពីមនុស្ស ទៅមនុស្សបាន ព្រោះថា «ស្ថានភាពបច្ចុប្បន្នគឺថា វាលែងជាវីរុសដែលចម្លងត្រឹមតែពីសត្វទៅមនុស្ស តែវាពីមនុស្សទៅមនុស្សតែម្តង» ។
វីរុសផ្លូវដង្ហើមថ្មីដែលកំពុងបង្កឲ្យប្រទេសចិន និងពិភពលោកព្រួយបារម្ភជាខ្លាំងនេះ ត្រូវបានអង្គការសុខភាពពិភពលោក (WHO) ប្រកាសរៀបចំកិច្ចប្រជុំ បន្ទាន់មួយ នៅក្នុងសប្តាហ៍នេះតែម្តង ។
បើតាមការបញ្ជាក់ពីអាជ្ញាធរចិន មនុស្សម្នាក់ទៀតហើយបានស្លាប់នៅថ្ងៃអង្គារនេះ ដែលប្រការនេះបានធ្វើឲ្យចំនួនមនុស្សស្លាប់សរុប នៅក្នុងទីក្រុងវូហាន (Wuhan) ភាគកណ្តាលប្រទេសចិនកើនឡើងដល់០៤នាក់ ។
វីរុសខូរ៉ូណា (Coronavirus) ត្រូវបានក្រុមជំនាញវេជ្ជសាស្ត្រចិនអះអាងថា មិនសូវខុសពីជំងឺ SARS ប៉ុន្មាននោះឡើយ ព្រោះពេលមនុស្សណាម្នាក់ឆ្លងជំងឺនេះ ប្រព័ន្ធផ្លូវដង្ហើមរបស់ពួកគេនឹងចុះទន់ខ្សោយខ្លាំងភ្លាមៗ ដោយអ្នកជំងឺនឹងស្លាប់ ប្រសិនបើមិនត្រូវបានសង្គ្រោះមិនបានទាន់ពេល ។
ក្រៅពីមនុស្សស្លាប់កើនដល់០៤នាក់នោះ អ្នកឆ្លងវីរុសនេះក៏បានកើនឡើងដល់២១៨នាក់ផងដែរ ខណៈប្រទេសផ្សេងៗទៀតក្រៅពីចិន ដូចជា ថៃ ជប៉ុន និងកូរ៉េខាងត្បូង ក៏បានអះអាងជាផ្លូវការថា បានរកឃើញអ្នកឆ្លងវីរុសផ្លូវដង្ហើមថ្មីផងដែរ ដោយពួកគេទាំងនោះសុទ្ធតែមានប្រភពពីប្រទេសចិនតែម្តង ។
ដោយឡែកនៅក្នុងប្រទេសចិនវិញ ក្រៅពីទីក្រុង Wuhan ដែលជាកន្លែងផ្ទុះជំងឺនេះដំបូង ទីក្រុងប៉េកាំង សៀងហៃ និងហ្សិនជិន ក៏ត្រូវបានគេរាយការណ៍ថា បានរកឃើញអ្នកឆ្លងជំងឺនេះដែរ ហើយពួកគេសុទ្ធតែធ្លាប់ធ្វើដំណើរទៅទីក្រុងវូហាន ។
មកដល់ពេលនេះ សូម្បីតែមន្ត្រីបម្រើការងារផ្នែកវេជ្ជសាស្ត្រចិន ១៥នាក់ ក៏កំពុងធ្លាក់ខ្លួនឈឺផងដែរ ក្នុងនោះម្នាក់មានអការៈធ្ងន់ធ្ងរ ដែលបានឆ្លងកូរ៉ូណាវីរុសពីអ្នកជំងឺ ៕
