ប៉េកាំង ៖ អាជ្ញាធរប្រទេសចិន កាលពីថ្ងៃចន្ទ ទី២០ មករា ២០២០ នេះបានរាយការណ៍ថា មនុស្សទី៣ ហើយបានស្លាប់ និង១៣៩នាក់ទៀត ឆ្លងជំងឺរលាកសួត ប្រភេទថ្មី វីរុសខូរ៉ូណា (Coronavirus) ដែលអ្នកជំនាញផ្នែកវេជ្ជសាស្ត្រចិន ក៏ដូចអន្តរជាតិ កំពុងសិក្សាស្វែងយល់អំពីវានៅឡើយ ។
ក្រុមមន្ត្រី ក៏បានបញ្ជាក់ផងដែរថា វីរុសនេះត្រូវបានគេរកឃើញ នៅក្នុងទីក្រុងប៉េកាំង និងទីក្រុងហ្សិនជិនកាលពីចុងសប្តាហ៍នេះ ដែលនេះគឺជាការរីករាលដាលបន្ថែមទៀត ។
សូមជម្រាបថា ទីក្រុងវូហាន (Wuhan) ភាគកណ្តាលប្រទេសចិន ដែលជាកន្លែង ដែលវីរុសខូរ៉ូណា ត្រូវបានរកឃើញដំបូង ការស្ទុះឡើងយ៉ាងគំហុក នៃអ្នកឆ្លងវីរុសនេះ ធ្វើអោយមានការព្រួយបារម្ភថា នឹងកើនឡើងចំនួនអ្នកឆ្ងងបន្ថែមទៀត ចំពេល ប្រជាជនចិន បាននិងកំពុងធ្វើដំណើរ វិលទៅស្រុកកំណើត ដើម្បីជួបជុំក្រុមគ្រួសារ ក្នុងអំឡុងពេលចូលឆ្នាំថ្មី ។
អង្គការសុខភាពពិភពលោក (WHO) អះអាងអំពីការឆ្លងថ្មី និងថា សត្វមួយ ទំនងជាប្រភពដើម នៃការឆ្លងនេះ ហើយការឆ្លងពីមនុស្សទៅមនុស្ស គឺទាល់តែមានការប៉ះពាល់ដោយផ្ទាល់ ។ យ៉ាងណា វីរុសនេះនៅជាអាថ៌កំបាំងនៅឡើយ ។
បើតាម WHO វីរុសបង្កជំងឺរលាកសួតនេះ ត្រូវគេដាក់ឈ្មោះថា កូរ៉ូណាវីរុស 2019-nCoV ។ វីរុសថ្មីនេះ បង្កការប្រកាសអាសន្ន ដោយសារវាស្រដៀងគ្នា នឹងវីរុសមួយ មានឈ្មោះថា សា(Sars) ដែលបានសម្លាប់មនុស្សជិត៨០០នាក់ កាលពី១៧ឆ្នាំមុន នៅទូទាំងពិភពលោក ៕
