ភ្នំពេញ៖ ក្រសួងរ៉ែ និងថាមពល បានប្រកាសបើកទទួលពាក្យប្រកួតប្រជែងជាសាធារណៈសម្រាប់ទទួលបានអាជ្ញាបណ្ណស្វែងរុករក ចំពោះតំបន់សម្បទានស្វែងរុករករ៉ែចំនួន ៨ តំបន់។
តំបន់សម្បទានស្វែងរុករករ៉ែចំនួន៨កន្លែងទៀត ត្រូវបានក្រសួងរ៉ែ និងថាមពលប្រកាសបើក តំបន់ស្វែងរុករករ៉ែទាំងនោះរួមមាន ទីតាំងទី១មានផ្ទៃក្រឡា១១២គីឡូម៉ែត្រក្រឡា ស្ថិតក្នុងតំបន់អូរកោងកាងក្នុងស្រុកថាឡាបរីវាត់ ខេត្តស្ទឹងត្រែង។ ទីតាំងទី២មានទំហំ១៩០គីឡូម៉ែត្រក្រឡា ក្នុងតំបន់ភ្នំនទោង ក្នុងស្រុកជ័យសែន ខេត្តព្រះវិហារ។ ទីតាំងទី៣មានទំហំ ១៤៥គីឡូម៉ែត្រក្រឡា ក្នុងតំបន់ភ្នំច្រាច ស្រុកឆែប និងស្រុកសែនជ័យ ខេត្តព្រះវិហារ។ ទីតាំងទី៤មានផ្ទៃដី១៥១គីឡូម៉ែត្រក្រឡា ក្នុងតំបន់ឃុំសុចិត្រ ស្រុកសណ្ដាន់ ខេត្តកំពង់ធំ។
ទីតាំងទី៥មានទំហំ២០០គីឡូម៉ែត្រក្រឡា ក្នុងតំបន់ខ្វាវខាងកើត ឃុំខ្វាវ ក្នុងខេត្តសៀមរាប និងឃុំស្រែយ៉ាងរណសិរ្ស ក្នុងខេត្តព្រះវិហារ។ ទីតាំងទី៦មានទំហំ២០០គីឡូម៉ែត្រក្រឡា ក្នុងតំបន់ខ្វាវខាងលិច ឃុំខ្វាវ ឃុំតាសៀម និងឃុំស្វាយលើ ខេត្តសៀមរាប។ ទីតាំងទី៧មានផ្ទៃដី១៩៦គីឡូម៉ែត្រក្រឡា ក្នុងតំបន់ព្រែកខ្លុង ស្រុកកែវសីមា ខេត្តមណ្ឌលគិរី និងទីតាំងទី៨មានទំហំ ១៩៥គីឡូម៉ែត្រក្រឡា ក្នុងតំបន់អូរខ្ទង់ ស្រុកកែវសីមា ខេត្តមណ្ឌលគិរី។
ក្រសួងបញ្ជាក់ថា បណ្តាក្រុមហ៊ុនជាតិ និងអន្តរជាតិ អាចដាក់ពាក្យស្នើសុំអាជ្ញាបណ្ណស្វែងរុករករ៉ែ ចាប់ពីពេលជូនដំណឹង រហូតដល់ ថ្ងៃទី១៥ ខែកុម្ភៈ ឆ្នាំ២០២០ ហើយលទ្ធផលនៃក្រុមហ៊ុនដែលនឹងទទួលបានអាជ្ញាបណ្ណ នឹងត្រូវប្រកាសជាសាធារណៈ បន្ទាប់ពីបានអនុវត្តតាមនីតិវិធីចប់សព្វគ្រប់ ៕
