ភ្នំពេញ ៖ មានករណីស្ត្រីម្នាក់លួចលូកយកកាបូបលុយគេ ខណៈជនរងគ្រោះដើរផ្សារទិញអីវ៉ាន់ឃើញកាបូបគេចំហ តែត្រូវម្ចាស់ចាប់បានប្រគល់ឱ្យសមត្ថកិច្ច នៅម៉ោង១០និង៤០នាទីព្រឹក ថ្ងៃទី១៤ ខែមករា ឆ្នាំ២០២០ នៅក្នុងផ្សារអូរប្ញស្សី សង្កាត់អូរឫស្សីទី១ ខណ្ឌ៧មករា ។
ជនសង្ស័យឈ្មោះគឹម ចាន់ទីន ភេទស្រី អាយុ៣២ឆ្នាំ ជនជាតិខ្មែរ មុខរបរលក់ដូរ រស់នៅភូមិកំពង់ថ្កូវ ឃុំកំពង់ថ្កូវ ស្រុកក្រឡាញ់ ខេត្តសៀមរាប ។
ចំណែកជនរងគ្រោះឈ្មោះស.ល ភេទស្រី ជនជាតិខ្មែរ មុខរបរបុគ្គលិកក្រុមហ៊ុន ស្នាក់នៅផ្ទះលេខ៤ជ ខណ្ឌចំការមន ។ សម្ភារបាត់បង់ រួមមានកូនកាបូបលុយចំនួន១ និងប្រាក់ចំនួន២០០ដុល្លារ ។
សមត្ថកិច្ច ឱ្យដឹងថា នៅមុនពេលកើតហេតុ ជនសង្ស័យបានចេញពីផ្ទះមិត្តភក្តិនៅម្តុំខាងក្រោយថ្មដា មកផ្សារអូរឫស្សី ដើម្បីរកទិញអីវ៉ាន់សែនដកជើងធូប ។ ពេលមកដល់ក្នុងផ្សារ ជនសង្ស័យដើរមើលដល់ច្រកទី១១ ឃើញជនរងគ្រោះកំពុងរកទិញអីវ៉ាន់ ហើយស្ពាយកាបូបចំហរ៉ូតខាងក្រោយខ្នង ជនសង្ស័យក៏ធ្វើសកម្មភាពលូកលួចយកកាបូបដាក់លុយនៅក្នុងកាបូបស្ពាយ ភ្លាមនោះ ជនរងគ្រោះដឹងខ្លួនទាន់ ក៏ចាប់កអាវ ជនសង្ស័យជាប់ នាំមកដល់ផ្លូវ១៨២ ជួបនឹងកម្លាំងល្បាតរបស់ប៉ុស្តិ៍នគរបាលរដ្ឋបាលអូរឫស្សីទី១ ក៏ឃាត់ខ្លួននាំយកទៅសាកសួរ ។
ជនសង្ស័យ ត្រូវបាននគរបាលខណ្ឌ៧មករា កសាងសំណុំរឿងបញ្ចូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី ៕
