ភ្នំពេញ ៖ សំណុំរឿងក្បត់ជាតិរបស់លោក កឹម សុខា ត្រូវបានតុលាការ បើកសវនាការនៅថ្ងៃពុធទី១៥ខែមករានេះ បន្ទាប់ពីប្រធានអតីតគណបក្សសង្គ្រោះជាតិរូបនេះត្រូវបានចាប់ខ្លួនកាលពីដើមខែកញ្ញា ឆ្នាំ២០១៧ ក្រោមបទចោទ «សន្និដ្ឋិភាព» ជាមួយបរទេស ។
សន្តិសុខត្រូវបានរឹតបន្តឹងជាខ្លាំង នៅបរិវេនសវនាការជំនុំជម្រះលើសំណុំរឿងសន្ទិដ្ឋិភាពរបស់ លោក កឹម សុខា មេដឹកនាំក្រុមប្រឆាំង នៅសាលាដំបូងរាជធានីភ្នំពេញ នាព្រឹកថ្ងៃនេះ ។
សវនានេះដឹកនាំដោយលោក កូយ សៅ អនុប្រធានសាលាដំបូង និងជាប្រធានក្រុមប្រឹក្សារជំនុំជម្រះ លោកចៅក្រម សេង លាង លោក ធាម ចន្ទ័ពិសិដ្ឋ ជាចៅក្រមប្រឹក្សា និងមានលោក វង្ស ប៊ុនវិសុទ្ធ ជាតំណាងអយ្យការ ។ ក្នុងសវនាការនេះ ក៏មានវត្តមានមេធាវីរាជរដ្ឋាភិបាលដឹកនាំដោយលោក គី តិច និងសាក្សីដាក់បន្ទុកមួយចំនួនផងដែរ ។
សវនាការនេះ តុលាការអនុញ្ញាតឱ្យមនុស្សប្រមាណតែ៣០នាក់ប៉ុណ្ណោះ ចូលស្តាប់សវនាការ ចំណែកអ្នកសារព័ត៌មានមិនអនុញ្ញាតនោះទេ ។ ការចូលសវនការនេះ ត្រូវឆ្លងកាត់ការត្រួតពិនិត្យជាមុនផងដែរ ។
អ្វីដែលជាការកត់សម្គាល់នោះ នៅពេលលោក កឹម សុខា បានទៅដល់តុលាការនាម៉ោង៧និង៤០នាទីព្រឹកគេពុំឃើញមានអ្នកគាំទ្រ ក្រុមប្រឆាំងណា ទៅប្រមូលផ្តុំខាងមុខសាលាដំបូងរាជធានីភ្នំពេញនោះទេ ៕