ខេត្តព្រៃវែង ៖ ដំបូងឡើយ សមត្ថកិច្ចមានបំណង គ្រាន់តែចង់ឃាត់ខ្លួនយុវតីឈ្មោះ ចាន់រី ដែលក្រុមអ្នកប្រើប្រាស់បណ្តាញសង្គមហ្វេសប៊ុក ដាក់រហ័សនាមឱ្យថា«បងធំមេសាង ខេត្តព្រៃវែង» យកមកធ្វើការអប់រំណែនាំប៉ុណ្ណោះ ប៉ុន្តែបែរជាឪពុកម្តាយនិងក្រុមគ្រួសារយុវតី ចាន់រី សម្តែងអាកប្បកិរិយាមិនសមរម្យមកលើសមត្ថកិច្ចនោះ ត្រូវបានលោកអធិការនគរបាលស្រុកមេសាង កសាងសំណុំរឿងបញ្ជូនទៅកាន់សាលាដំបូងខេត្តព្រៃវែង ដោយជាប់ចោទពីបទបង្ករបួសស្នាមដោយចេតនាលើអ្នកដទៃ ។
តាមរយៈវីដេអូចែកចាយក្នុងបណ្ដាញសង្គម យុវតី ចាន់រី មានបក្ខពួកជាច្រើននាក់ បានស្ទាក់ម៉ូតូរបស់យុវតីចំនួន៤នាក់ផ្សេងទៀត ដែលអះអាងថា ជាអ្នកមកពីស្រុកផ្សេង មិនមែននៅស្រុកមេសាងនោះទេ ហើយមូលហេតុដែលស្ទាក់សួរនាំ និងគំរាមរកវាយគេនោះ ដោយសារតែភាគីម្ខាងទៀត បានមើលមុខខ្លួន ។
លោក នូវ ហាច អធិការនគរបាលស្រុកមេសាង បានប្រាប់ឲ្យដឹងថា ហេតុការណ៍ដែលយុវតី ចាន់រី និងបក្សពួកស្ទាក់វាយយុវតីរងគ្រោះនោះ បានកើតឡើងតាំងពីថ្ងៃទី១១ មករា មកម្លេះ បន្ទាប់ពីយុវតីទាំងអស់នោះ មកពីមើលគេប្រកួតបាល់នៅវិទ្យាល័យមេសាង ប៉ុន្តែរឿងរ៉ាវនេះបានបែកធ្លាយ បន្ទាប់ពីបក្សពួករបស់គេ បង្ហោះវីដេអូឃ្លីប ដែលថតពីសកម្មភាពរបស់យុវតី ចាន់រី គំរាមនិងវាយយុវតីរងគ្រោះ ចូលក្នុងបណ្តាញសង្គម ហ្វេសប៊ុក ។ ក្រោយឃើញវីដេអូមិនសមរម្យដែលត្រូវបានចែកចាយ ដែលអាចប៉ះពាល់ដល់សន្ដិសុខ សណ្ដាប់ធ្នាប់សង្គម លោកបានធ្វើការស្រាវជ្រាវ រហូតដល់កម្លាំងនគរបាលស្រុកមេសាង ឈានដល់ការឃាត់ខ្លួនយុវតីខាងលើយកមកសួរនាំ កាលពីវេលាម៉ោង១និង៣០នាទីរសៀលថ្ងៃទី១៣ មករា ២០២០ តែម្តង ។
អធិការនគរបាលស្រុកមេសាង បានបន្តថា បន្ទាប់ពីឃាត់ខ្លួនមកសួរនាំ ដឹងថាយុវតីម្នាក់នេះឈ្មោះ ចាន់ រី ជាសិស្សថ្នាក់ទី១១ នៅវិទ្យាល័យមេសាង ហើយកន្លងទៅមិនធ្លាប់បានធ្វើសកម្មភាពបែបនេះឡើយ ពោលទើបតែលើកទី១នោះទេ ហេតុដូច្នេះ កម្លាំងសមត្ថកិច្ចជំនាញបានធ្វើការអប់រំយុវតីរូបនេះតែប៉ុណ្ណោះ ហើយឲ្យធ្វើកិច្ចសន្យាបញ្ឈប់សកម្មភាពបែបនេះ និងមានការធានាពីអាណាព្យាបាល ទើបអនុញ្ញាតឲ្យត្រឡប់ទៅផ្ទះវិញ មិនបានកសាងសំណុំរឿងបញ្ជូនទៅតុលាការអ្វីនោះទេ ។
លោកអធិការ បន្ថែមថា ប៉ុន្តែនៅពេលដែលសមត្ថកិច្ចកំពុងតែធ្វើការអប់រំណែនាំ បែរជាឪពុកម្តាយ និងបងប្អូនសាច់ញាតិរបស់នាង លើកគ្នាមកកាន់អធិការដ្ឋាននគរបាលស្រុក ដោយបានស្រែកឡូឡា អុកឡុកជាខ្លាំង និងបានគំរាមចង់ប្តឹងបកទៅសមត្ថកិច្ចវិញទៀត ដោយអះអាងថា កូនស្រីរបស់គាត់គ្រាន់តែខុសឆ្គងតិចតួច មិនសមណាសមត្ថកិច្ចចាប់វាយខ្នោះនោះទេ ធ្វើបែបនេះ គឺប៉ះពាល់ដល់កិត្តិយសរបស់នាងខ្លាំងណាស់ ។
លោក នូវ ហាច បានបញ្ជាក់ថា ដោយមើលឃើញពីអាកប្បកិរិយាមិនសមរម្យ របស់គ្រួសារយុវតី ចាន់រី មកលើសមត្ថកិច្ចបែបនេះ ទើបលោករាយការណ៌ឆ្លងយោបល់ទៅលោកព្រះរាជអាជ្ញា ហើយព្រះរាជអាជ្ញា ក៏បញ្ជាអោយកសាងសំណុំរឿងបញ្ជូនទៅសាលាដំបូងខេត្តតែម្តង ដោយចោទប្រកាន់ពីបទ បង្ករបួសស្នាមដោយចេតនាលើអ្នកដទៃ ហើយបច្ចុប្បន្ននេះកំលាំងសមត្ថកិច្ចជំនាញ នៃស្នងការដ្ឋាននគរបាលខេត្តព្រៃវែង កំពុងចាត់ការបន្តទៅតាមនិតិវិធី មុនបញ្ជូនទៅកាន់សាលាដំបូងខេត្ត ៕
អត្ថបទពាក់ព័ន្ធទី១ អបអរសាទរ ! ក្រុមយុវតីជើងខ្លាំង ស្ទាក់វាយគេចោទដណ្តើមសង្សារ ថតវីដេអូបង្ហោះហ្វេសប៊ុក ត្រូវសមត្ថកិច្ចឃាត់ខ្លួន… (មានវីដេអូ)
ទី២ ចាន់រី ប្រហែលជាចង់ជួបសមត្តកិច្ចម្ដងទៀតហើយ ! ចេញពីប៉ុស្តិ៍ភ្លាម ស្រាប់តែបង្ហោះពាក្យមួយចំនួនថា…
ទស្សនាវីដេអូឃ្លីប